Mańǵystaýda teńizge sýǵa túsýge bolmaıtyn jerler belgilendi

AQTAÝ. QazAqparat – Mańǵystaý oblystyq máslıhaty Kaspıı teńiziniń jaǵasynda shomylýǵa tyıym salynǵan taǵy 5 jerdi belgiledi, dep habarlaıdy QazAqparat tilshisi.

Apparattyq jıynda óńirlik Tótenshe jaǵdaı departamenti oblystyq máslıhat sheshimimen shomylýǵa tyıym salynǵan jaǵalaýlardyń qataryna 5 ýchaskege qosylǵanyn habarlady.

Olar: 1) 43 shaqyrym; 2) «Kógildir aılaq» 64 shaqyrym; 3) «Saýra» 82 shaqyrym; 4) «Tamshyly» Fort-Shevchenko qalasynan Taýshyq aýylyna qaraı 30 shaqyrym; 5) «Sarytas» Fort-Shevchenko qalasynan Taýshyq aýylyna qaraı 51 shaqyrym.

«Taldaý kórsetkendeı, jazataıym oqıǵalardyń negizgi sebepteri áli de tyıym salynǵan nemese jabdyqtalmaǵan jerlerde sýǵa shomylý bolyp otyr. Aıta ketsek, Mańǵystaý oblystyq máslıhatynyń 2018 jylǵy 30 mamyrdaǵy №19/236 sheshimimen sýǵa túsýge tyıym salynǵan ýchaskeler aıqyndaldy, olar: 4 shaǵyn aýdan Kaspıan Rıvera qonaq úıinen 5 sh/a Fılarmonııaǵa deıin jáne «Shora» sý kanaly», delingen ákimdiktiń baspasóz habarlamasynda.

Sondaı-aq, jıyn barysynda jazǵy maýsym kezindegi sýǵa shomylý jáne óńirdegi órt qaýipsizdigi erejelerin qamtamasyz etý boıynsha qabyldanyp jatqan is-sharalar talqylandy.