Mańǵystaýda teńizge shomylǵan balalardy ıtbalyq tistep alǵan

AQTAÝ. QazAqparat - Túpqaraǵan aýdanynda tórt er balany jáne jeti jasar qyz balany ıtbalyq tistep alǵan, dep habarlaıdy QazAqparat tilshisi.

Bul jaǵdaı 8 maýsymda saǵat 19.40 shamasynda oryn alǵan.

Mańǵystaý oblysy Densaýlyq saqtaý basqarmasynyń baspasóz qyzmetiniń habarlaýynsha, sýda shomylyp júrgenderdiń eń úlkeni 20 jasta, al eń kishisi 7 jasqa da tolmaǵan.

Túpqaraǵan aýdandyq aýrýhanasynyń qabyldaý bólmesine eki balany jedel medıtsınalyq járdem brıgadasy jetkizse, qalǵan úsheýi ózderi barǵan.

«Dárigerler balalardyń bilekteri tistelgenin anyqtady. Kishkentaı naýqastarǵa alǵashqy hırýrgııalyq amaldar jasalyp, qutyrmaǵa qarsy vaktsına egildi, odan keıin úılerine qaıtaryldy. Aýrýhanaǵa jatqyzý qajet bolǵan joq. Aldaǵy ýaqytta medıtsınalyq kómek kerek bolsa, dárigerdi úıge shaqyrtyp, em alady»,-delingen habarlamada.