Mańǵystaýda teńiz jaǵasyna shyǵyp qalǵan kishkentaı ıtbalyq qutqaryldy
Bozdaq (ıtbalyqtyń balasy) Aqtaý qalasyndaǵy Kaspıı ıtbalyǵyn zertteý jáne ońaltý ortalyǵynda eki aptadaı bolǵan. Ortalyqqa túsken kezde álsiz, salmaǵy 4,4 keli ǵana bolsa, qazir 7 kelige deıin jetti. Óz kúshimen júzip, balyq ustaı bastady.
Ortalyq qyzmetkerleri bozdaqtyń damýy jaqsy jáne ilgerileý baıqalatynyn aıtty.
«Bozdaqtyń tábeti jaqsy, óte epti, sonymen qatar óz kúshimen taǵam jeı bastady. Ektoparazıtterden tazartý protsedýrasyn ótkizdik»,- delingen habarlamada.
Aıta keteıik, Aqtaýdaǵy Kaspıı ıtbalyǵyn zertteý jáne ońaltý ortalyǵyna 29 naýryzda saǵat 10.00-de jergilikti turǵyndardan Baýtıno kentinde teńiz jaǵasynda ıtbalyqty tapqany týraly qońyraý túsken. Kýágerlerdiń aıtýynsha, ıtbalyq jaǵada eki kúndeı jatyp qalǵan.
Ortalyq mamandary ıtbalyq tabylǵan jerge baryp, oǵan alǵashqy veterınarııalyq kómek kórsetken. Alǵashynda ıtbalyqtyń jaǵdaıy qıyn jáne qozǵalyssyz jatqan. Sol kúni ony ortalyqqa jetkizgen. Mamandardyń aıtýynsha, bozdaqtyń jasy-bir aı, dene salmaǵy-4,4 keli. Ol bul jasta 10-12 keli tartýy kerek.