Mańǵystaýda teńiz sýyn tuşytatyn zaýyt salynady
AQTAÝ. QazAqparat - Mańǵystaý oblysynda aýyz sý máselesi ózekti. Bul máseleni sheshýdiń birden bir joly - sý tuşytatyn zaýyt salý, dep habarlady Mańǵystaý oblysy ákimdiginiń baspasóz qyzmeti.
Sol sebepti, óńirge resmı saparmen «BeltWay Group Limited» kompanııasynyń dırektory Álı Mohamad pen «Astana Qyzmet-KZ» JShS dırektory Bolat Ydyrysbaev, «SafBon Water Service (Holding) Inc.» mekemesiniń bas menedjeri Vang Ksıan keldi.
Olar Mańǵystaý oblysynda sý suşytý zaýytyn salýdy kózdeıdi. Sondyqtan, arnaıy joba daıyndap ony oblys ákimi Eraly Toǵjanovqa jáne jıynǵa qatysýshylarǵa tanystyrdy.
Aıta keteıik, «BeltWay Group Limited» kompanııasy 1995 jyly Shanhaıda qurylǵan. Búginde mekeme álemdik deńgeıde, túrli sala boıynsha qyzmet kórsetip keledi.
«BeltWay Group Limited» kompanııasynyń dırektory Álı Mohamad jobany iske asyryp, eń ozyq tehnologııany paıdalanýǵa daıyn ekenin jetkizdi. Jospar boıynsha zaýyt Quryq aýylynan 22 shaqyrym jerde ornalasady. Qorek kózi retinde gaz-týrbınalyq elektr stantsııasy paıdalanylady. Qýattylyǵy kúnine 80 myń kýb metr jáne bolashaqta onyń qýattylyǵy arta túspek. Tuşytylǵan sýmen «ÓzenMunaıGaz» AQ, Jetibaı, Quryq aýyldary men Aqtaý, Jańaózen qalalaryn qamtamasyz etilmek. Sonymen qatar, bul joba óńirde aýylsharýashylyǵy salasyn damytýǵa tyń serpin bermek.
Jıyn sońynda oblystyq ákimdik pen kompanııa arasynda uzaqmerzimdi jáne ózara tıimdi yntymaqtastyq týraly memorandýmǵa qol qoıyldy.
Óńir basshysy Eraly Toǵjanov jobany daıyndaý jáne júzege asyrý máselelerimen aınalysatyn jumys tobyn qurýdy tapsyrdy.
