Mańǵystaýda teńiz sýyn tuşylaıtyn 9 zaýyt salynady

ASTANA. QazAqparat – 2025 jyly Mańǵystaýda aýyz sý tapshylyǵy táýligine 100-110 myń tekshe metrge jetýi múmkin. Bul týraly QR IIDM Qurylys jáne turǵyn úı-kommýnaldyq sharýashylyq isteri komıteti tóraǵasynyń orynbasary Ázimbek Pazylbekuly aıtty, dep habarlaıdy QazAqparat tilshisi.

Onyń aıtýynsha, Mańǵystaý oblysynda sý qubyry jelileri júrgizilgen, biraq tuşy sý tapshylyǵy bar.

«Búgingi tańda aımaq negizinen «Astrahan-Mańǵyshlaq» sý qubyry jáne tuşylanǵan teńiz sýy arqyly qamtamasyz etiledi. Olardyń jıyntyq qýaty - táýligine 164 myń tekshe metr. Jazǵy kezeńde aýyz sý tapshylyǵy táýligine – 50 myń tekshe metrge jetedi. Óńirdiń damý deńgeıin eskere otyryp, sýǵa qajettilik 2025 jylǵa qaraı táýligine 100-110 myń tekshe metr bolady degen boljam bar», - dedi Á. Pazylbekuly ortalyq kommýnıkatsııalar qyzmetinde ótken baspasóz máslıhatynda.

Bul máseleni sheshý úshin 9 tuşylandyrý zaýytyn salý boıynsha iri jobalar josparlanǵan.

«Qazir bizdiń mınıstrliktiń bıýdjettik baǵdarlamasy aıasynda Aqtaý qalasyndaǵy «Kaspıı» tuşylandyrý zaýytynyń qýatyn táýligine 40 myń tekshe metrge deıin keńeıtý jobasy iske asyp jatyr. Joba bıyl jyl sońyna deıin aıaqtalady. Sondaı-aq, bıyl Fort-Shevchenko qalasynda tuşylandyrý zaýytynyń qurylysyna 4,2 mlrd teńge jáne Aqtaý qalasynda qýaty táýligine 24 myń tekshe metr bolatyn «MAEK-Qazatomónerkásip» JShS aýmaǵynda ornalasqan zaýyt qurylysyna 10 mlrd teńge bólindi», - dedi komıtet ókili.

Budan bólek, bıyl jeke ınvestıtsııa esebinen «Qarajanbas» ken ornynda qýaty 17 myń tekshe metr zaýytyn aıaqtaý josparlanyp otyr.

Buǵan deıin Ázimbek Pazylbekuly Astanadaǵy sý tapshylyǵy máselesi qalaı sheshiletinin aıtqan edi.