Mańǵystaýda teńiz sýyn tuşylandyratyn zaýyt salynady
Oblys ákimi baspasóz qyzmetiniń málimetinshe, Eraly Toǵjanov osy aýdanǵa jumys sapary barysynda «GFM Qazaqstan» JShS bazasyndaǵy trenıng ortalyǵynyń jáne aýdandyq jumyspen qamtý ortalyǵynyń «Open Space» jańa formattaǵy jumysymen tanysqan. Sondaı-aq aýdan ákiminiń m.a. Qydyrberdi Bekovtyń 2017 jyly atqarǵan jumystary jáne alǵa qoıǵan mindetteri týraly halyq aldynda bergen esebin tyńdady.
«Bıyl aýdanda 27 qudyq qazý josparlanyp otyr. Aqqudyq aýylynda jańbyr sýyn jınaýǵa arnalǵa 5 myń tekshe metrlik toǵan qurylysyn salýǵa jobalyq-smetalyq qujattamasy jasalýda», - dedi Qaraqııa aýdany ákiminiń m.a. Qydyrberdi Bekov.
Aýdanda qurylys jumystarynyń kólemi 2017 jyly 50 mlrd teńgege jetti. Búgingi kúni Quryq paromdyq kesheni arqyly barlyǵy 1 475 830 tonna júk tasymaldandy (ımport 593 348 teńge, eksport - 882 482 teńge). Sonymen qatar, 28 júk avtokóligimen 584,7 tonna júk eksporttaldy.
«Qaraqııa aýdanynda memlekettik-jekeshelik áriptestik baǵdarlamasy sheńberinde Quryq aýyly teńiz jaǵalaýynan táýligine 50 myń tekshe metrge deıin sý tuşytatyn zaýyt qurylysyn salýdy josparlap otyrmyz. Jobanyń arqasynda 450 jańa jumys oryny paıda bolady jáne aýdandaǵy aýyz sý men tehnıkalyq sý máselesi tolyq sheshimin tabatyn bolady. Joba quny - 50,0 mlrd teńge. Oblys ákimniń birinshi orynbasary Serik Amanǵalıevke, oblystyq energetıka jáne turǵyn-úı kommýnaldyq sharýashylyǵy basqarmasyna osy máseleni túbegeıli sheshýdi tapsyramyn», - dedi oblys ákimi Eraly Toǵjanov.
