Mańǵystaýda tarıhı-mádenı muralar keshendi ekspedıtsııasy bastaldy

Reseı Ǵylym Akademııasynyń Reseı tarıhy ınstıtýtynyń bas ǵylymı qyzmetkeri, professor, tarıh ǵylymdarynyń doktory Vadım Trepavlov bastaǵan ekspedıtsııa músheleri oblys ákimi Eraly Toǵjanovpen kezdesti.

Ekspedıtsııa maqsaty - Mańǵystaý oblysynyń materıaldyq jáne materıaldyq emes tarıhı-mádenı muralaryn zertteý maqsatynda shetelden ǵalym-mamandardy tartý, Qazaqstannyń tarıhı-mádenı murasyn ulttyq jáne halyqaralyq deńgeıde nasıhattaý, Mańǵystaý oblysynyń tarıhı-mádenı muralaryn aımaq boıynsha keshendi ǵylymı ekspedıtsııa ótkizý arqyly baıandaý, Sakraldy baǵyttaǵy tarıh jáne mádenıet eskertkishterin zertteý, oblys turǵyndarynyń dástúrli jáne turmystyq baǵyttaryn, halyq shyǵarmashylyǵyn (folklor) zertteý, Epıgrafıkalyq eskertkishterge zertteýler ótkizý (fıksatsııa), Keshendi ekspedıtsııa qorytyndysy boıynsha ǵylymı esepter daıyndaý.

«Mańǵystaý óńiri - ózderińiz jaqsy biletindeı, tabıǵaty bólek, tarıhy tereńde jatqan aımaq. Ǵylymı zertteýlerdi talap etetin, ejelgi órkenıet eli. Elbasymyz N.Á.Nazarbaev: «Árbir halyqtyń, árbir órkenıettiń barshaǵa ortaq qasıetti jerleri bolady, jas urpaqtyń sanasyna sol qasıetti oryndardyń uǵymyn sińirýimiz kerek. Bul - rýhanı dástúrdiń basty negizderiniń biri» degen bolatyn. Mine, «Rýhanı jańǵyrý» baǵdarlamasy aıasynda ózderińizdiń birge úlken ǵylymı ekspedıtsııasyn qolǵa alyp otyrmyz. Sizderdiń eńbekterińiz - Ulttyq tarıh pen tanym jáne patrıotızmdi qalyptastyrýǵa negiz bolatyna senimim mol», - dedi Mańǵystaý oblysynyń ákimi Eraly Toǵjanov.

Ǵylymı ekspedıtsııa ólkeniń baǵa jetpes tarıhı murasy ulttyq ıdeologııanyń bóligi etý, elimizdiń álemdik brendin joǵarylatý, týǵan ólkege degen súıispenshilik pen patrıotızmdi arttyrýǵa baǵyttalǵan. Ekspedıtsııa barysynda noǵaıly kezeńiniń eskertkishteri jáne aımaqtyń shyńyraý-qudyqtary zertteledi. Ekspedıtsııa qorytyndysy boıynsha «Kazakh TV» arnasynda qazaq, orys jáne aǵylshyn tilderinde taratylatyn birneshe serııadan turatyn derekti fılm daıyndalady.

«Kıeli Mańǵystaý jeri - ata-babalarymyzdyń mekeni. Bul aımaqty túrki áleminiń arheologııasynyń ortalyǵyna aınaldyrýymyz kerek. Osyndaı keshendi ekspedıtsııany qolǵa alyp, halyqaralyq ǵalymdardy shaqyrǵandaryńyzǵa raqmet aıtamyn», - dedi Izmır qalasyndaǵy (Túrkııa) Egeı ýnıversıtetiniń professory, fılologııa ǵylymdarynyń doktory Metın Ekıchı.

Sondaı-aq, jıynda Á.Marǵulan atyndaǵy Arheologııa Instıtýtynyń antıkalyq kezeń jáne orta ǵasyr arheologııasy bóliminiń aǵa ǵylymı qyzmetkeri Erden Oralbaı Mańǵystaý oblysynan Arheologııa Instıtýtynyń fılıalyn ashýdy usyndy.

Ekspedıtsııa marshrýtynyń jalpy uzaqtyǵy - 2000 km.Ekspedıtsııa merzimi: 10 kún.