Mańǵystaýda taksı júrgizýshisi jolaýshyny tonap ketken
AQTAÝ. QazAqparat - Mańǵystaýda 2 tonaý oqıǵasy izi sýymaı ashyldy, dep habarlaıdy QazAqparat tilshisi.
Naýryzdyń 9-nan 10-na qaraǵan túni taksı júrgizýshisi jáne onyń aǵasy jolda turǵan jolaýshyny kólikterine mingizip alǵan. Aram pıǵyldylar kólikke mingen azamatty dittegen jerine jetkizýdiń ornyna, Ómirzaq aýylyna aparyp qaltasyndaǵy 30 myń teńge men "Taıota Prada" kóliginiń kiltin tartyp alǵan. Dál sol túni Aqtaý polıtsııa basqarmasynyń kezekshi bólimine taǵy da qońyraý shalynady. Belgisiz kólik júrgizýshisi bir azamatty "Grın park" qurylysyna aparyp, 150 myń teńge jáne baǵaly zattaryn kúshtep alǵan. Jedel aldyn alý sharasy barysynda polıtsııa qyzmetkerleri qylmysty izin sýytpaı ashty. Kúdiktiler ýaqytsha ustaý oqshaýlaǵyshyna qamalyp, aıǵaqty zattar tárkilenip alyndy. Sotqa deıingi tergeý júrgizilýde.
