Mańǵystaýda sybaılas jemqorlyq týraly habarlaǵandar 800 myń teńge syıaqy aldy

AQTAÝ.QazAqparat – Mańǵystaýda jyl basynan beri sybaılas jemqorlyq faktileri týraly habarlaǵan tórt azamat 800 myń teńge kóleminde syıaqy aldy, dep habarlaıdy QazAqparat tilshisi.

«Bıyl sybaılas jemqorlyq derekteri týraly habarlaǵan tórt azamat syıaqy aldy. Olardyń bergen aqparaty negizinde qylmys ashylyp, sot úkimi kúshine engen soń komıssııa sheshimimen syıaqy taǵaıyndaldy. Osy azamattar habarlaǵan derekter aýyrlyǵy ortasha jáne aýyr sybaılas jemqorlyq qylmystyq isterdiń sanatyna jatady», - dedi Sybaılas jemqorlyqqa qarsy qyzmet departamentiniń asa mańyzdy ister jónindegi tergeýshisi Zýlfııa Abıshaeva.

Sybaılas jemqorlyq jaǵdaılary týraly habarlaǵan adam aqshalaı qarajatpen marapattalady jáne memlekettiń qorǵaýynda bolady.

Sybaılas jemqorlyq quqyq buzýshylyq faktisi týraly habarlaǵan nemese sybaılas jemqorlyqqa qarsy is-qımylda ózge de jolmen járdemdesetin adamdarǵa birjolǵy aqshalaı syıaqy mólsheri bylaı esepteledi:

- sybaılas jemqorlyq quqyq buzýshylyqtar týraly ákimshilik ister boıynsha – 30 AEK;

- onsha aýyr emes sybaılas jemqorlyq qylmystyq ister boıynsha – 40 AEK;

- aýyrlyǵy ortasha sybaılas jemqorlyq qylmystyq ister boıynsha – 50 AEK;

- aýyr sybaılas jemqorlyq qylmystyq ister boıynsha – 70 AEK;

- asa aýyr sybaılas jemqorlyq qylmystyq ister boıynsha – 100 AEK.

Para nemese keltirilgen zalal somasy 1000 AEK-ten asatyn bolsa, birjolǵy aqshalaı syıaqy kórsetilgen somanyń 10 % quraıdy, biraq 4000 AEK-ten aspaıdy.

Syıaqy sot úkimi shyqqannan keıin tólenedi.

Aıta keteıik, sybaılas jemqorlyq faktilerimen kezdesken azamattar 1424 nemese (7292) 319110 baılanys nomerine qońyraý shalý qajet.