Mańǵystaýda sý tushytý zaýytynyń qurylysy bastalady
ASTANA. QazAqparat - Mańǵystaý oblysynda sý tushytý zaýytynyń qurylysy bastalady. Bul týraly búgin Úkimet otyrysynda QR Investıtsııalar jáne damý mınıstri Jeńis Qasymbek málim etti, dep habarlaıdy QazAqparat tilshisi.
Onyń aıtýynsha, Memleket basshysynyń Joldaýyn iske asyrý aıasynda mınıstrlik turǵyn úı-kommýnaldyq sharýashylyqtaǵy 11 jergilikti memlekettik-jekeshelik jobanyń iske asyrylýyna monıtorıng jasaǵan. Búgingi kúni Atyraý, Shyǵys Qazaqstan, Pavlodar oblystary jáne Almaty qalasynda 6 joba boıynsha jeke ınvestorlarmen shart rásimdelgen.
«Sonymen birge, biz quny 50 mlrd teńge bolatyn Mańǵystaý oblysyndaǵy sý tushytý zaýytyn salý jónindegi kontsessııalyq jobasyn eń perspektıvaly joba dep sanaımyz. Búgingi kúni ákimdikpen eki kezeńdik konkýrstyń nátıjesinde jeke áriptes anyqtaldy. Bul jobany iske asyrý óńirdegi aýyz sýdyń tapshylyǵyn 71,4 paıyzǵa deıin tómendetýge múmkindik beredi», - dedi Jeńis Qasymbek.
Mınıstrdiń sózine qaraǵanda, energııa únemdeý salasynda «Transport Taýer» ákimshilik-tehnologııalyq kesheni ǵımaratynyń jaryqtandyrý júıesin jańǵyrtý jáne paıdalaný» jobasy memlekettik-jekeshelik áriptestik aıasynda júzege asyrylady.
«Shart 2018 jyldyń mamyr aıynda otandyq jaryq dıodty tehnıka óndirýshisimen jasaldy. Osy aıdyń sońyna deıin joba boıynsha barlyq jumystar aıaqtalady. Sonymen qatar, energııa únemdeý salasynda óńirlermen birlesip jalpy somasy 9,7 mlrd teńgege bolatyn 3 jobany iske asyrylýda. Pavlodar oblysynda quny 4,6 mlrd teńge bolatyn Pavlodar jáne Ekibastuz qalalarynyń syrtqy jaryqtandyrý júıesin jańǵyrtý jáne paıdalaný» jobasy bar. Jobalar boıynsha sharttar 7-8 jyl merzimge jasaldy. Onyń aıasynda jaryqtandyrý kózderin tıimdi energııa túrlerine aýystyrý, kósheniń jaryqtandyrý jelilerin jańǵyrtý, basqarýdyń avtomattandyrylǵan júıesin engizý kózdelgen», - dedi ol.
Mınıstr «Atyraý qalasynda kóshe jaryq jelileriniń qurylysy jáne paıdalaný» jobasy júzege asyryla bastaǵanyn aıtty.
«Shart 7 jylǵa «BatysTranzıt» JShS-men 5,1 mlrd teńgege jasaldy», - dedi Jeńis Qasymbek.
