Mańǵystaýda sý tuşytý zaýyty salynady
ASTANA. QazAqparat - Mańǵystaýda sý tuşytý zaýyty salynady, dep habarlaıdy oblys ákiminiń baspasóz qyzmeti.
Mańǵystaý oblysynda aýyz sý máselesi sheshý úshin sý tuşytý zaýytyn salý qajet. Sol sebepti, búgin óńirge resmı saparmen «BeltWay Group Limited» kompanııasynyń dırektory Álı Mohamad pen «Astana Qyzmet-KZ» JShS dırektory Bolat Ydyrysbaev, «SafBon Water Service (Holding) Inc.» mekemesiniń bas menedjeri Vang Ksıan keldi. Olar Mańǵystaý oblysynda sý suşytý zaýytyn salýdy kózdeıdi. Sondyqtan, arnaıy joba daıyndap, oblys ákimi Eraly Toǵjanovqa jáne jıynǵa qatysýshylarǵa tanystyrdy.
Aıta keteıik, «BeltWay Group Limited» kompanııasy 1995 jyly Shanhaıda qurylǵan. Búginde mekeme álemdik deńgeıde, túrli sala boıynsha qyzmet kórsetip keledi.
«BeltWay Group Limited» kompanııasynyń dırektory Álı Mohamad jobany iske asyryp, eń ozyq tehnologııany paıdalanýǵa daıyn ekenin jetkizdi. Jospar boıynsha zaýyt Quryq aýylynan 22 shaqyrym jerde ornalasady. Zaýytqa qýatty gaz-týrbınalyq elektr stansasy beredi. Ol kúnine 80 myń tekshe metr sý beredi. Sondaı-aq bolashaqta onyń qýattylyǵy arta túspek. Tuşytylǵan sýmen «ÓzenMunaıGaz» AQ, Jetibaı, Quryq aýyldary men Aqtaý, Jańaózen qalalaryn qamtamasyz etilmek. Sonymen qatar, bul joba óńirde aýylsharýashylyǵy salasyn damytýǵa tyń serpin bermek.
Jıyn sońynda oblystyq ákimdik pen kompanııa arasynda uzaq merzimdi jáne ózara tıimdi yntymaqtastyq týraly memorandýmǵa qol qoıyldy.
Óńir basshysy Eraly Toǵjanov jobany daıyndaý jáne júzege asyrý máselelerimen aınalysatyn jumys tobyn qurýdy tapsyrdy.
