Mańǵystaýda stýdentter jataqhanamen tolyq qamtylady
AQTAÝ. QazAqparat - 2021 jyly aımaqta stýdentter 100% jataqhanamen qamtylady.
Bul týraly apparattyq jıynda bilim basqarmasynyń basshysy Asqar Seıdalıev aıtty, dep habarlaıdy Qazaqparat tilshisi.
Jalpy, búgingi tańda aımaqta stýdentter tarapynan 1464 orynǵa suranys bar.
Bilim basqarmasy basshysynyń aıtýynsha, 2 jyl ishinde 9 jataqhana iske qosylmaq. Bıyldan bastap, Aqtaý tehnologııalyq qyzmet kórsetý kolledji janynan 300 oryndyq, Mańǵystaý energetıkalyq kolledji janynan 300 oryndyq, 17 shaǵyn aýdannan 500 oryndyq nysan salynbaq. Taǵy da birneshe jobanyń smetalyq-qujattary qaralyp jatyr.
Osylaısha, bıyl 970 oryndyq 3 jataqhana, 2021 jyldyń sońyna deıin 2100 oryndyq 5 jataqhana paıdalanýǵa beriledi dep josparlanǵan.
Qazir oblysta 2 joǵarǵy oqý ornynda 6831 stýdent, 27 kolledjde 21244 stýdent oqıdy. Óńirdegi 6 jataqhanada 1564 adam orynmen qamtylǵan.
«Elbasynyń 5 áleýmettik bastamasy negizinde stýdentterdiń jataqhanamen qamtylý jaǵdaıyna kelsek, kolledjderdegi 21244 stýdenttiń, 52% ıaǵnı 11086-y aýyldyq jerden kelip bilim alyp jatqan stýdentter. Suranysty qamtamasyz etý maqsatynda ınvestorlarmen de jumys jasap jatyrmyz. 2 kolledj janynan salamyz. Árqaısysy 300 oryndyq. Qujattyq rásimderi bar. Jerdi «SPK Kaspııge» beremiz. Olar barlyq qarajatty bólemiz dep otyr»,-deıdi Asqar Seıdalıev.
