Mańǵystaýda sozylmaly aýrýy bar naýqastarǵa 5 mlrd 746 mln teńgege dári-dármek alyndy

AQTAÝ. QazAqparat – Byltyr Mańǵystaý oblystyq densaýlyq saqtaý basqarmasy Áleýmettik medıtsınalyq saqtandyrý qoryna dári alý úshin 5 mlrd 746 mln teńgege ótinim jiberdi. Nátıjesinde sozylmaly aýrýlary bar naýqastar preparattarmen qamtamasyz etildi, dep habarlaıdy QazAqparat tilshisi.

«Qazir 2023 jylǵa ótinish qabyldanyp jatyr. Biraq dárilerdiń bir bóligi biryńǵaı dıstrıbıýtor arqyly satyp alyndy. Qalǵan dárilerdi kútip otyrmyz. Barlyǵy alynǵan soń oblysqa jetkiziletin bolady. 2021 jyly Shetpedegi 1 naýqasqa dári alynyp, oblystyq kópbeıindi aýrýhanada birinshi ampýlasy salyndy. Sonymen qatar Fabrı aýrýymen aýyratyn, gormonaldy preparattardy qoldanatyn naýqastar da bar», - dedi Mańǵystaý oblystyq densaýlyq saqtaý basqarmasy dárimen qamtamasyz etý bóliminiń bas mamany Janar Tólebaeva.

Dárigerlerdiń aıtýynsha, ambýlatorlyq deńgeıde tegin dári-dármek alý úshin naýqas eń aldymen emhanaǵa tirkeledi. Analız tapsyryp, aýrýy rastalǵannan keıin dıspanserlik esepke turýy kerek. Oǵan qosa naýqastyń derekteri tirkeý jýrnalynda bolý qajet.

Al eger tegin dári-dármek naýqasqa berilmeı jatsa, 1439 qysqa nómerine tegin qońyraý shalyp, tolyq aqparat bilýge bolady.