Mańǵystaýda soltústikke kóshýge kelisken otbasynyń ár múshesine 240 myń teńgeden tólenedi
Mańǵystaý oblysynda jumyssyz júrgen jandar erikti qonys aýdarý baǵdarlamasymen kóship, materıaldyq kómek ala alady.
Bul týraly qoǵamdyq kommýnıkatsııa ortalyǵynda ótken brıfıngte Mańǵystaý oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Áset Shopanov habarlady.
Baǵdarlama jumys kúshiniń utqyrlyǵyn arttyrý maqsatynda jumys kúshi jetispeıtin oblystarǵa erikti túrde qonys aýdarý úshin qarastyrylǵan.
Sondaı-aq, spıker 2023 jyly qandastar men qonys aýdarýshylardy qabyldaýdyń óńirlik kvotasyna sáıkes oblystardy atap ótti.
- 2023 jylǵa qandastarmen qonys aýdarýshylardy qabyldaýdyń óńirlik kvotasyna sáıkes Abaı, Aqmola, Qaraǵandy, Qostanaı, Pavlodar, Soltústik Qazaqstan, Ulytaý, Shyǵys Qazaqstan oblystary belgilendi. Baǵdarlamaǵa qatysýshylarǵa, ıaǵnı otaǵasyna jáne árbir otbasy múshesine bir ret 70 AEK (241 500 tenge) mólsherinde kóshýge materıaldyq kómek jańa turǵylyqty jerge kelgennen keıin beriledi. Mysaly, eger otbasynda 6 adam bolsa, barlyǵyna 1,5 mln teńge beriledi. Bul qarjy baspanaǵa beriletin qarajattan bólek bolmaq,-dedi Áset Shopanov.
Osy baǵdarlamamen 2022 jyly barlyǵy 45 otbasy, ıaǵnı 205 adam qonys aýdarǵan. Qazir olardyń barlyǵy da jumyspen qamtyldy.
Bul eki qolǵa bir kúrek tappaı júrgen jandarǵa úlken múmkindik berdi.
Sondaı-aq, Túrikmenstannan kelgen 20 otbasy (95 qandas) dál osyndaı múmkindikpen soltústikke qonys aýdarǵan. Solardyń biri - Mels Rymbaev.
Ol erikti túrde Soltústik Qazaqstan oblysy Aqjar aýdany Voshod aýylyna 2022 jyly qonys aýdarǵan.
Memleket ár otbasy múshesine 214 410 teńge qarjylaı kómek kórsetken.
«Meniń tórt balam bar. Barlyǵy mektepke ornalastyryldy. Jergilikti ákimdik kıim, tamaq máselelerimen kómek kórsetti. Baspanamyz bar. Óte jyly. Qazirde gaz elektr dánekerleýshi bolyp qyzmet etemin. Aıtar alǵysym sheksiz»,- deıdi Mels Rymbaev.
Aıta keteıik, qalalyq jerlerge qonys aýdarǵan bir adam úshin 20 AEK (60 000 teńge), otbasy músheleriniń sany ekeýden tórteýge deıin bolsa 25 AEK (86 250 teńge), al otbasy músheleriniń sany beseý jáne odan kóp bolǵan kezde 30 AEK (103 500 teńge) mólsherinde tólenedi.
Al, aýyldyq jerlerge qonys aýdarǵan bir adam úshin 15 AEK(51 750 teńge) otbasy músheleriniń sany ekeýden tórteýge deıin bolǵan kezde 18 AEK (62 100 teńge) mólsherinde, al otbasy músheleriniń sany beseý jáne odan kóp bolǵan kezde 21 AEK (72 450 teńge) tólenedi.
Erikti qonys aýdarý baǵdarlamasyna qatysýshylar turǵylyqty mekenjaıy boıynsha jumyspen qamtý ortalyqtaryna júgine alady.
