Mańǵystaýda sırek kezdesetin «SMA» aýrýyna shaldyqqan búldirshinge salynǵan preparat oń nátıje berip jatyr

AQTAÝ.QazAqparat - Mańǵystaýda sırek kezdesetin «SMA» aýrýyna shaldyqqan búldirshinniń jaǵdaıy jaqsaryp keledi. Balanyń julynyna 38 mıllıon teńge turatyn genetıkalyq preparat ret-retimen engizilip jatyr, dep habarlaıdy QazAqparat tilshisi.

Medıtsınalyq kórsetkish boıynsha naýqastyń qımyl-qozǵalysy artyp keledi.

«SMA aýrýyna shaldyqqan qyz balaǵa «Spınraza» atty gendik preparatty 3 ret julynǵa engizdik. Birinshi ınektsııasy 21 jeltoqsan kúni salyndy. Al ekinshisi 4 qańtarda, úshinshisi 18 qańtarda salyndy. Endi 20 aqpanda tórtinshisi engiziledi. Bala eń alǵash kelgen kezde anasynyń kómegi arqyly otyratyn edi. Birinshi preparatty salǵannan soń ózdiginen otyra alatyn boldy. Qazir ol arqasyn túzý ustaıdy. Qolyna qalam ustap jazady, sýret te salady. Onyń usaq motorıkasy damyp kele jatyr, ıaǵnı oń ózgeris bar, - deıdi Mańǵystaý oblystyq kópbeıindi balalar aýrýhanasynyń nevropatolog dárigeri Marııa Aldabergenova.

Emdik preparatty alý úshin Mańǵystaý oblystyq densaýlyq saqtaý basqarmasy respýblıkalyq bıýdjetten qarjy qarastyrǵan.

«Bul - tuqymqýalaýshylyq genetıkalyq aýrý. Julynnyń aldyńǵy jaǵynda ornalasqan qozǵalys neırondarynyń bolmaýynan týyndaıdy. Naýqastyń qımyl-qozǵalysqa eshqandaı áreketi bolmaıdy. Mundaı balalar otyra almady. Júre almaýynan bólek, qımyl qozǵalysy bolmaıdy. Olardy tekserip, zerttep, turǵylyqty jeri boıynsha medıko-genetıkalyq analız alyp, respýblıkalyq «Ana men bala» ortalyǵyna jiberemiz», - dedi dáriger.

Búginde oblys boıynsha atalǵan syrqat túrine 4 bala shaldyqqan.