Mańǵystaýda shalǵaıdaǵy aýylǵa joǵary kerneýli elektr jelisi tartyldy

AQTAÝ. QazAqparat -Beıneý aýdanynyń Er Tólep aýylyna joǵary kerneýli elektr jelisi tartyldy, dep habarlaıdy Qazaqparat tilshisi.

Alǵashqy elektr baǵanasy 2017 jyldyń tamyz aıynda ornatylǵan bolatyn.

«Er Tólep aýyly osydan 50 jyl buryn quryldy. Sodan beri toq kózi temirjol jelisinen alynyp keldi. Sondyqtan jaryq berý máselesinde kedergiler bolatyn. Endi bul máseleniń de sheshimi tabyldy. Aýylǵa Beıneý eldi mekeninen 83 shaqyrym jerden 10 kvt-tyq elektr jelisi tartyldy. Osy maqsatta jergilikti bıýdjetten 798 mln 503 myń teńge bólindi. Merdiger mekeme «Aıkom LTD» jaýapkershiligi shekteýli seriktestigi. Aldaǵy ýaqytta Beıneý-Tólep baǵytynda kásipkerlik nysandar kóbeıip, aýyl ajarlana túsedi degen senimdemiz» - dedi aýdan ákimi Beıneýbek Ábilov.

Er Tólep aýyly Beıneý aýdanynyń batys jaǵynda 95 shaqyrym qashyqtyqta ornalasqan. Halyq sany -1003 adam.