Mańǵystaýda sergek júıesi iske qosyldy - feık

AQTAÝ. QazAqparat - Áleýmettik jelide Mańǵystaýda 26 mamyrdan bastap sergek júıesi iske qosyldy degen aqparat tarady. Jaýaptylar aqparattyń jalǵan ekenin aıtty, dep habarlaıdy QazAqparat tilshisi.

Habarlamada belgisiz er adam sergek júıesiniń 1 maýsymnan emes, 26 mamyrdan bastap iske qosylǵanyn aıtyp, qaladaǵy kólik júrgizýshilerin saq bolýǵa shaqyrǵan.

Mańǵystaý oblystyq polıtsııa departamentiniń resmı ókili Gúlshara Bastaýbaeva bul aqparatty joqqa shyǵardy.

«Aýdıojazbada taralǵan aqparat shyndyqqa janaspaıdy. Sergek júıesi qosylǵan ýaqytta óńir turǵyndaryna mindetti túrde aqparat taratylady. Sondyqtan, óńir turǵyndaryn tek resmı aqparat kózderine senýge shaqyramyn», - dedi ol.