Mańǵystaýda satýshynyń betine ystyq maı shashyp jibergen kúdikti 2 aıǵa tutqyndaldy
ASTANA. QazAqparat - Mańǵystaý oblysynda satýshynyń betine ystyq maı shashyp jibergen kúdikti 2 aıǵa tutqynǵa alyndy. Bul týraly QR ІІM Memlekettik til jáne aqparat departamentiniń dırektory Almas Sadýbaev aıtty, dep habarlaıdy QazAqparat.
«Mańǵystaý oblysynda vokzal mańyndaǵy ashana satýshysynyń ústine ystyq maı quıyp, densaýlyǵyna aýyr zaqym keltirgen kúdikti atalǵan qylmysty jasaǵany úshin ákimshilik jaýapkershilikke tartylǵan joq. BAQ-ta zardap shegýshiniń týystary kúdiktiniń ákimshilik jaýapkershilikke tartylǵanyn aıtqany týraly aqparat shyndyqqa saı emes. Bastapqyda sot-medıtsınalyq qorytyndynyń jáne soǵan sáıkes zardap shegýshiniń densaýlyǵyna aýyr zaqym kelgeni týraly málimettiń bolmaýyna baılanysty qylmystyq is QR Qylmystyq kodeksiniń 293-baby 1-tarmaǵy boıynsha buzaqylyq retinde qozǵaldy. Bul bap 2 jylǵa deıin bas bostandyǵynan aıyrýǵa deıingi qylmystyq jaýapkershilikti kózdeıdi», - dedi ol.
Onyń aıtýynsha, sot-medıtsınalyq qorytyndynyń bolmaýyna baılanysty Mańǵystaý oblystyq Іshki ister departamenti qylmystyq isti durys saralap, der ýaqytynda ony qozǵaǵan. Bul rette zańdylyqty buzýshylyqqa qandaı da bir jol berilmegen.
«Qylmystyq isti Qylmystyq kodekstiń 106-babymen qaıta saralaý zardap shegýshini aýrýhanada tekserý jáne onyń jaı-kúıin medıtsına qyzmetkerleri anyqtaǵannan keıin 2 qarasha kúni júrgizildi. Kúdikti ustaldy, aýdandyq sot oǵan qatysty 2 aıǵa «tutqynǵa alý» sharasyn sanktsııalady. Tergeý amaldary ІІM Tergeý departamentiniń baqylaýynda tur», - dedi Almas Sadýbaev.
