Mańǵystaýda sanıtarlyq karantınge arnalǵan 7 pýnkt jumys isteıdi

AQTAÝ. QazAqparat – Oblys aımaǵynda koronovırýsqa baılanysty karantınge jatqyzatyn statsıonarlar bekitilgen, dep habarlaıdy QazAqparat tilshisi.

Bul týraly oblystyq taýarlar men kórsetiletin qyzmetterdiń sapasy men qaýipsizdigin baqylaý departamenti basshysy Erǵalı Sydymanov aıtyp berdi.

«Karantınge jatqyzylǵandar Mańǵystaý oblystyq aýrýhananyń juqpaly aýrýlar bólimine (60 oryn), oblystyq týberkýlezge qarsy dıspanser (200 oryn) men Jańaózen qalalyq kópbeıindi aýrýhananyń juqpaly aýrýlar bólimine (60 oryn) ornalastyrylady»,-deıdi Erǵalı Sydymanov.

Koronavırýs ınfektsııasynyń aldyn alý jáne respýblıka aımaǵyna taratpaý maqsatynda QR bas memlekettik sanıtar dárigeriniń 4 naýryzdaǵy qaýlysy kúshine engen. Qaýlyǵa sáıkes, koronavırýs ınfektsııasy boıynsha qolaısyz shet memleketterdiń tizimi kategorııa boıynsha anyqtaldy.

«Oblys kóleminde shet memleketterden keletin azamattardy QR shekarasynan ótkizý barysynda arnaıy sanıtarlyq karantındik pýnkt mamandary qyzmet kórsetedi», - deıdi Mańǵystaý oblysy densaýlyq saqtaý basqarmasynyń basshysy Anýar Saǵymbaev.

Oblys kóleminde 7 sanıtarlyq karantındik pýnkt jumys isteıdi. Onyń ishinde 2-ýi avtókólik beketindegi «Temir-Baba», «Tajen», 2-ýi Aqtaý, Quryq teńiz porttarynda, 1-ýi áýejaıda, 2-ýi temirjolda («Bolashaq» jáne «Oazıs» Beıneý stansasy). Kelýshi azamattardyń barlyǵy teplovızormen tekserilip, qaralady.

Halyqaralyq áýejaıdaǵy sanıtarlyq karantın pýnktilerine Aqtóbe qalasynan 4 maman, Obaǵa qarsy kúres stansasynan jáne Mańǵystaý oblysynyń taýarlar men qyzmetterdiń sapasy men qaýipsizdigin baqylaý departamenti mamandary jumyldyryldy. Іshki jáne syrtqy reısterge tekserý kúsheıdi.

5 naýryzdan bastap Ázerbaıjanǵa reıster (7 reıstiń ornyna 1 reıske deıin) azaıdy.

Búgingi kúni oblysta 23 adam medıtsınalyq baqylaýda (onyń ishinde Iran eliniń azamattary - 15, al 8 - qazaqstandyqtar).