Mańǵystaýda sambodan el chempıonaty máresine jetti
AQTAÝ. QazAqparat - Aqtaýda Sambo kúresinen 2001-2002 jyly týǵan jasóspirim ul-qyzdar arasynda Qazaqstan chempıonaty máresine jetti. El birinshiliginde úsh qala men on tórt oblystan barlyǵy 500-ge tarta balýan óner kórsetti, dep xabarlaıdy QazAqparat tilshisi.
Jarys jeńimpazdary men júldegerlerine Qazaqstan Respýblıkasy «sport sheberine úmitker» ataǵy berildi.
Mańǵystaý - eldegi sambo sporty qarqyndy damyǵan óńirdiń biri. Ótken jyly Ramazan Mamaev jastar arasynda álem chempıony atandy. Al sońǵy 3 jylda mańǵystaýlyq balýandar el chempıonatynda komandalyq esepte aldyńǵy orynnan kórindi. Osy jetistikter birinshilikti Aqtaýda ótkizýge sep bolǵan.
«Arnaıy sarapshylar sportshylardyń qandaı deńgeıde ekenin anyqtady. Josparymyz - Mańǵystaý quramasyn aldaǵy ýaqytta 3 ret Qazaqstan chempıony atandyrý», - deıdi oblystyq «Jas batyr» mamandandyrylǵan balalar men jasóspirimder sport mektebiniń dırektory Manarbek Bısekenov.
Bıylǵy chempıonatqa rekordtyq kólemde 500-ge tarta ul men qyz kelgen. Olar 20 salmaqta ózara myqtyny anyqtady. Jarystyń alǵashqy kúni 48, 52, 56, 60 , 65 kelide chempıondar anyqtaldy. 48 kelide synǵa túsken mańǵystaýlyq Nursultan Jubathan chempıon atandy. Chempıon irikteý kezeńinde álem chempıonatynyń júldegeri qyzylordalyq balýannan basym tústi. Al fınalda aqtóbelik qarsylasyna aıla qaldyrmady.
«Fınaldyq kezdesý qıyn ótti. Aqtóbelik balýan osal emes eken. Biraq men odan da basym bolyp, jeńiske jettim. Ózimniń taktıkamdy qoldandym. Ol ońqaı kúresedi eken. Men onyń ońqaıyn basyp aldym. Ol sodan keıin kúrese almaı, men jeńiske jettim»,-deıdi chempıon.
Eki kúnge jalǵasqan jarys qorytyndysynda 3 altyn, 2 kúmis jáne 3 qola medalmen mańǵystaýlyq samboshylar kósh bastady. Jarysty Almaty oblysy ekinshi , Atyraý oblysy úshinshi bolyp aıaqtady. Jarys qorytyndysynda jeńimpaz atanǵan balýandar qazan aıynda Tashkentte ótetin álem, Taıpeıde ótetin Azııa chempıonatynda el namysyn qorǵaıdy.
