Mańǵystaýda salqyndatqysh jáne jylytqysh qurylǵylarmen jabdyqtalǵan aıaldamalar salynyp jatyr

AQTAÝ.QazAqparat – Mańǵystaý oblysynyń Munaıly aýdanynda salqyndatqysh jáne jylytqysh qurylǵylary bar zamanaýı aıaldamalar salynyp jatyr, dep habarlaıdy QazAqparat tilshisi.

Aıaldamalar salqyndatqysh jáne jylytqysh qurylǵylarmen qamtylady. Zamanaýı aıaldamanyń ereksheligi - kólik kútip turǵan turǵyndardyń qysta dalada tońyp turmaı, aıaldamanyń ishine kirip jylynýyna, jazda kerisinshe, salqyn jerde otyrýyna jaǵdaı jasalady.

«Aýa raıynyń salqyndyǵyna qaramastan qurylys jumystary qarqyndy júrip jatyr. Shamamen 30-40 jumysshy osy istiń basy-qasynda óz mindetterin barynsha sapaly oryndaý úshin jumystanýda. Barlyǵy 31 aıaldama jyl sońyna deıin tapsyrylady. Qurylys jumystary osy jyldyń orta tusynda bastalǵan», dep málim etti Munaıly aýdanynyń baspasóz qyzmetinen.

Jańa nysan Mańǵystaý aýylyndaǵy «Aıshat» meıramhanasynan Basqudyq aýyldyq okrýgindegi «Anýar» dúkenine deıingi avtokólik jolynyń boıynda ornalasqan. Aýdandyq turǵyn úı kommýnaldyq sharýashylyǵy, jolaýshylar kóligi jáne avtomobıl joldary bóliminiń málimetinshe, qazirgi tańda jumystyń 80 paıyzy oryndalyp tur.