Mańǵystaýda sábı ólimi 21,8 paıyzǵa tómendedi
ASTANA. QazAqparat - Mańǵystaý oblysynda jyl basynan beri 16083 náreste dúnıege keldi. Olardyń 156-sy - egiz, 5-eýi - úshem, dep habarlaıdy QazAqparat aımaq basshysynyń baspasóz qyzmetine silteme jasap.
Mańǵystaý oblysy boıynsha densaýlyq saqtaýdy damytýdyń 2016-2019 jyldarǵa arnalǵan «Densaýlyq» memlekettik baǵdarlamasyn iske asyrý sheńberinde qabyldanǵan sharalar bıylǵy jyly negizgi medıtsınalyq-demografııalyq kórsetkishterdi jaqsartýǵa múmkindik berdi.
2017 jylǵy on aıdaǵy náreste óliminiń kórsetkishi tiri týǵan 1 myń balaǵa shaqqanda 7,8-di qurady. Byltyrǵy jylmen salystyrǵanda bıyl óńirde sábı ólimi 21,8%-ǵa azaıdy. Analar ólimi tiri týǵan 100 myń sábıge shaqqanda 13,8 boldy, jalpy kórsetkish 11,2 qurady.
Oblys ákimi Eraly Toǵjanov náreste men ana óliminiń aldyn alý maqsatynda densaýlyq saqtaý basqarmasyna juqpaly aýrýlar men olardyń sebepteri týraly jurtshylyqty aqparattandyrý úshin medıa-jospar ázirleýdi tapsyrǵan bolatyn.
Ana men bala óliminiń aldyn alý úshin birneshe shara qabyldandy:
1. 2017 jyldyń jeltoqsan aıynda 150 tósek-orynǵa eseptelgen óńirlik Ana men bala kútimi ortalyǵynyń qurylysy josparlanýda.
2. Oblystyq mamandandyrylǵan Balalar úıiniń bazasynda Balalar aýrýlaryn keshendi basqarý jónindegi resýrstyq ortalyq ashyldy.
4. Aqtaý qalasyndaǵy №1 emhanada, Jańaózen qalalyq №2 emhanada «SOS Qashyqtan antenataldyq kútim» jobasy iske asyryldy.
5. Akýsher-gınekolog, neonatolog, reanımatolog jáne akýsherlerdiń 20 mamanynan quralǵan 7 brıgada shetelde DDU-nyń tehnologııasymen biliktilikterin arttyryp qaıtty.
6. 15 akýsher-gınekolog «24 saǵat jáne 7 kún» erejesi boıynsha jedel akýsherlik patologııany dıagnostıkalaý úshin ýltradybystyq daǵdylar boıynsha daıyndyqtan ótti.
7. MJÁ mehanızmi boıynsha uryqtyń týa bitken kemistikterin der kezinde dıagnostıkalaý úshin 1 mıllıard 16 mıllıon teńge quraıtyn 16 birlik ýltradybystyq zertteý tehnıkasyn satyp alý jumystary júrgizilýde.
Mańǵystaý oblystyq densaýlyq saqtaý basqarmasynyń mindetin atqarýshy Klara Oralbaevanyń aıtýynsha, aımaqta mamandarmen qamtý máselesi jolǵa qoıylyp keledi. Ótken jyly oblysta 358 maman jetispeıtin bolsa, bıylǵy jyly óńirge 161 mamannyń kelýiniń nátıjesinde kadr tapshylyǵy 197-ge deıin azaıdy. Onyń ishinde aımaqqa eńbek etýge 11 pedıatr, 18 akýsher-gınekolog, 5 anestezıolog-reanımatolog keldi.
