Mańǵystaýda «Rýhqa - uran, ultqa - qorǵan» atty aqyndar aıtysy ótti
Mańǵystaý oblysy ákimdiginiń bastamasymen uıymdastyrylǵan saıystyń maqsaty - aıtys óneriniń damýyna memlekettik deńgeıde qoldaý kórsetý, elimizdiń táýelsizdik jyldarynda qol jetkizgen tabystary men qundylyqtaryn, óńirde júzege asyrylyp jatqan jasampaz jobalardy dáripteý, Mańǵystaý aıtys mektebiniń shyǵarmashylyq áleýetin nasıhattaý.
«Abyl men Nurym, Qashaǵan men Sáttiǵuldaı sóz zergerlerin týdyrǵan Mańǵystaý topyraǵynda, kóneden jetken bekzat óner, sýyrypsalmalyq-ımprovızatorlyq shyǵarmashylyqtyń bıik shyńy - aıtys qaıta jańǵyrdy. Aıtys - bet jyrtysyp, jaýaptasý emes, saıasattan ada, ordaly oıy, suńǵyla sózimen tyńdarmannyń kóńil túkpirine oı salyp, zamana sazyn tolǵap, eldikke, yntymaqqa úndeý! Halyq jazýshysy Ábish Kekilbaıulynyń sózimen aıtar bolsaq: «Bıik talǵamdy tek salıqaly óner, salaýatty sýretker ǵana ósiredi. Bıik talǵamsyz bıik parasat joq. Al bıik parasat úlken jaýapkershilik. Búgingi úlken ózgerister onsyz júzege asa almaıdy. Rýhanı bedersizdik saıası táýelsizdikti de tárk etedi». Sebebi, sana ózgermeı, sapa ózgermeıdi. Sondyqtan aqyndarymyz «Rýhanı jańǵyrý» uǵymyn tereńnen taldap, osy uǵym aıasyndaǵy otansúıgishtik, Táýelsiz elimizdiń jetistikterin jan-jaqty jyrlaı bilýleri kerek. Sóz qadiri tómendemeı, búgingi aıtystyń dúbiri dúnıeni sharlasyn, tyńdaýshynyń qulaq quryshyn qandyrsyn! Merekemiz qutty bolsyn!»,- dedi aıtys barysynda aqyndarǵa aq jol tilegen Mańǵystaý oblysynyń ákimi Eraly Toǵjanov.
Jyr báıgesine respýblıkaǵa tanymal 18 aqyn qatysyp, baq synady.
Aıtys qorytyndysynda bas júldeni (árqaısysy 3 mln teńgeden) mańǵystaýlyq Mels Qosymbaev pen pavlodarlyq Aspanbek Shuǵataev jeńip aldy. Qyzylordalyq Muhtar Nııazov birinshi (2 mln teńge), semeılik Ásem Erejeqyzy men batysqazaqstandyq Jansaıa Mýsına ekinshi (1 mln teńgeden), Rústem Qaıyrtaıuly (Almaty), Abaı Jolmaǵambetov (Mańǵystaý), Shalqarbaı Іzbasarov (Atyraý) jáne Ershat Qaıboldın (Aqtóbe) úshinshi orynǵa (400 myń teńgeden) ıe boldy.
«Bul joly aqyndar sahnada jerebe sýyryp, aıtysty. Soǵan qaramastan, deńgeıi joǵary boldy. ıAǵnı eshkim jurt oılaıtyndaı, aldyn ala daıyndalmaı, sýyrypsalmalyqtyń úlgisin kórsetti», dedi «QazAqparat» tilshisine Ásem Erejeqyzy.
Shara aıasynda sondaı-aq «Elbasy jáne rýhy jańǵyrǵan Mańǵystaý» dep atalatyn fotokórme ótti. Kórmege 100-ge jýyq sýretter qoıylǵan. Mańǵystaý oblysynyń ákimi Eraly Toǵjanov arnaıy baryp, Elbasynyń óńirimizdegi sapary barysyndaǵy sýretter men aımaqta ótken tarıhı sharalardyń kórinisin tamashalady.
