Mańǵystaýda respýblıkalyq mańyzy bar joldardan 17 kemshilik tabyldy
Bul týraly qoǵamdyq kommýnıkatsııa ortalyǵynda ótken brıfıngte «Jol aktıvteri ulttyq sapa ortalyǵy» RMK Mańǵystaý oblystyq fılıaly dırektorynyń mindetin atqarýshy Sáken Muhtarov habarlady.
Spıkerdiń aıtýynsha, sońǵy úsh jylda Mańǵystaý oblysyndaǵy respýblıkalyq mańyzdaǵy avtomobıl joldaryna 982 ret baqylaý reıdi ótken.
- Jyl basynan beri 6 nysan boıynsha 100 ret baqylaý reıdi jasaldy. 375 synama aldyq. Sonyń 14-i standarqa sáıkes kelmeı shyqty. Sondaı-aq 17 kemshilik tabyldy. Solardy túzetilýin surap, ákimdikter men ýákiletti organdarǵa qyzmettik hattar jazylyp, joldandy. Jalpy, mamandar sońǵy 3 jylda respýblıkalyq mańyzdaǵy avtomobıl joldaryna 982 ret baqylaý reıdin ótkizdi, jol qurylys materıaldarynan 2405 synama aldy. 2020 jyly 168 synamalardyń 9-y tehnıkalyq standarttarǵa sáıkes emes boldy jáne 128 kemshilikti taptyq. Anyqtalǵan kemshilikter 2021 jyly tolyq joıyldy. Al, 2021 jyly 613 jol qurylys materıaldarynyń 108-i synama standarttarǵa saı emestigin anyqtadyq jáne joldardan 42 olqylyq taptyq. Olar da óz kezeginde 2022 jyly belgilengen jospar boıynsha tolyǵymen joıylý kerek, - dedi Sáken Muhtarov.
Budan bólek, jergilikti mańyzdaǵy joldarda 2019 jyldan bastap búginge deıin 255 ret reıd jasalǵan.
1966 synama alynyp, anyqtalǵan kemshilikter túzetilgen. Keıbir synama quramy zerthanalyq saraptamadan ótip jatyr.
- Fılıalymyzda mobıldi jyljymaly zerthana bar. Osy apparat arqyly jylyna 800 shaqyrymnan astam joldarda aspaptyq dıagnostıkalaý jumystary jasalady. Mamandarymyz jol ústindegi belgiler men jol tańbalaryn da tekseredi. Mysaly, 2021 jyly 500-den astam jol belgisin qarap, tehnıkalyq talaptarǵa sáıkes kelmegen jol belgileri boıynsha aqparat jergilikti atqarýshy organdarǵa joldandy. Al jol tańbalaryn tek qana respýblıkalyq mańyzy bar joldarda tekseremiz. Anyqtalǵan kemshilikter der kezinde joıylyp jatyr, - dedi Sáken Muhtarov.