Mańǵystaýda Respýblıka kúnine oraı 50-ge jýyq shara ótedi
«Qala, aýdandarda ár salada eńbek sińirgen qyzmetkerlerdi, eńbek ardagerlerin marapattaı otyryp, saltanatty jıyndar ótedi. Respýblıka kúnine oraı turǵyndardy aqparattandyrý maqsatynda 51 merekelik banner, bılbord jáne basqa da syrtqy kórnekilik quraldar ornalastyryldy» - dedi Mańǵystaý oblystyq Іshki saıasat basqarmasynyń basshysy Nurtas Salı.
Mańǵystaý oblysy boıynsha «Qyran elim – Qazaqstanym!» patrıottyq jalpyulttyq aktsııasy uıymdastyrylyp jatyr. Aktsııa aıasynda áleýmettik jeli qoldanýshylary erekshe beınequttyqtaýlardy jáne patrıottyq shyǵarmalardy jatqa oqyp, Instagram jelisinde 25 qazanǵa deıin #Mańǵystaý #Respýblıkakúni heshtegimen joldaı alady. Sondaı-aq 20 qazan kúni saǵat 15:00 de «Dostyq» úıinde «Jyrlansyn el birligi» respýblıkalyq jyrshylar festıvali ótedi. Festıvalǵa elimizdiń 5 jyr mektebinen ıaǵnı Mańǵystaý, Syr boıy, Batys Qazaqstan, Jetisý, Arqa jyraýlyq mektebinen barlyǵy 15 jyrshy qatysady.
Al 25 qazan teńiz jaǵalaýynda Ámın Tuıaqovtyń 85 jyldyǵyna arnalǵan marafon uıymdastyrylyp, marafon sońy Mańǵystaý óner juldyzdarynyń kontsertine ulasady.
Sonymen birge, volonterlik jáne erikti uıymdar arqyly azamattardyń áleýmettik osal toptaryn qoldaý úshin «Janashyr júrek» halyqtyq aktsııasy uıymdastyrylyp jatyr. Qaıyrymdylyq ıdeıasyn jergilikti bıznes-qoǵamdastyqtar, demeýshiler, metsenattar azyq-túlik satyp alyp ony úlestirip jáne tazalyq jumystaryn júrgizý arqyly júzege asyrady.
«Á. Kekilbaev atyndaǵy oblystyq tarıhı-ólketaný mýzeıiniń tarıh zalynyń ashylýy, Otpan tarıhı-mádenı kesheninde «Egemen eldiń erteńi – eren erdeı eńseli!» respýblıka kúni men keshenniń ashylǵan kúnine oraı merekelik shara, fotokórme, N. Jantórın atyndaǵy oblystyq mýzykalyq-drama teatrynda T. Dosymov «Bıiktik» spektakli, Oblystyq fılarmonııada «Elim meniń» atty merekelik kontserti sııaqty sharalar ótpek», - dedi Mańǵystaý oblystyq mádenıet, arhıvter jáne qujattama basqarmasy basshysynyń orynbasary dedi Gúlzaıda Tóleýǵalıeva.
