Mańǵystaýda «Rallı Qazaqstan - 2019» óz máresine jetti

AQTAÝ. QazAqparat. «Rallı Qazaqstan - 2019» Álem kýbogy kezeńi óz máresine jetti. Shıeleniske toly alty jarys kúniniń qorytyndysy boıynsha katarlyq avtoshabandoz Nasser Ál-Attııa bas júldeni ıelendi, - dep habarlaıdy Qazaqparat tilshisi.

Ekinshi oryndy erli-zaıypty Stefan men Andrea Peteranselderdiń ekıpajy ıelense, úzdik úshtikti ıAkýb Pshıgonskı men Tımo Gottshalk túıindedi.

Alty kezeńniń qorytyndysy boıynsha Nasser Ál-Attııa úzdikter kóshin bastady. Ol «Rallı Qazaqstan» kezeńiniń eki dúrkin jeńimpazy. Toyota Hilux avtokóligin tizgindegen shabandoz bıyl 6 jarysqa qatysyp, barlyǵynda da top jarǵan. Al, T2 sanatynda Toyota Landcruiser avtokóligindegi taǵy bir katarlyq Mohammed Ál-Meer dara shyqty.

«Búgin biz Kaspıı teńiziniń jaǵasynda máre syzyǵyn kestik. Sóz joq, ádemi peızajdar, tamasha jaǵajaı. Endi Marokko rallıin kútemiz. Álbette, bul - biz úshin jaqsy jyl. Barlyǵyn baqylaýymyzda ustadyq. «Rallı Qazaqstannan» úlken tájirıbe aldym», - deıdi Mohammed Ál-Meer.

Rallı-reıd óńirde 27 mamyr men 1 maýsym aralyǵynda ótken bolatyn. Avtoshabandozdar shólde qum jáne qumsyz, tóbe joldarmen júrip ótti. Barlyǵy 2,5 myń kılometrden astam qashyqtyqty baǵyndyrdy. Sporttyq saıysqa álemniń 17 elinen 28 ekıpaj baq synady. Al, Qazaqstan atynan 3 ekıpaj qatysty. Andreı Cherednıkov pen shtýrman Ignat Falkov 6-shy oryn ıelendi.