Mańǵystaýda provızorlyq statsıonarǵa túsetin naýqastar sany 2,5 ese azaıdy

AQTAÝ. QazAqparat - Munaıly aýdandyq aýrýhanasyna eki apta buryn bir kúnde 60-qa jýyq naýqas koronovırýs belgilerimen júginetin bolsa, qazirgi tańda bul kórsetkish tómendegen, dep habarlaıdy QazAqparat tilshisi.

Munaıly ortalyq aýdandyq aýrýhanasy dárigerleriniń málimdeýinshe, aýdandaǵy fıltr kabınetindegi dárigerlerge qaralatyndar sany salystyrmaly túrde azaıǵan. Máselen, ortalyqta bes fıltr kabıneti jumys jasap tur. Osydan eki apta buryn mundaǵy aq halattylar kúnine 60-qa jýyq naýqasty qabyldaıtyn.

Atameken aýylyndaǵy fıltr kabınetiniń dárigeri Mahabbat Abdashevanyń aıtýynsha, osy aptada dertine em izdep kelýshiler qatary edáýir sıregen. Bul - qýantarlyq jaǵdaı.

«Ásirese, pnevmonııa óte kóp boldy. Bir kúnde 40-60 adam qabyldadyq. Sonyń 35-i - pnevmonııa, 15-i - JRVI belgilerimen keletin»,- deıdi Mahabbat Abdasheva.

Aýdanda 40 oryndyq provızorlyq statsıonar jumys istep tur. Budan bólek, 12 ottegi kontsentraty bar.

«Qazirgi ahýal bárimizge belgili. Іndet órship, aýrý dendegender sany artty. Biraq bir-birimizdi qoldaý arqyly bul qıyndyqty da eńseretinimiz anyq. Kómek qolyn sozǵan janashyr azamattar men kásipkerler aıanyp jatqan joq. Jaqynda Birikken Arab Ámirlikterinen de gýmanıtarlyq kómek óńirimizge jetti. Qoldaý bildirip, dárigerler men emdelýshilerge kórsetken qoldaýlaryńyzǵa alǵys aıtamyz. Karantın jarııalanǵaly aýyryp em izdegender sany azaıdy. Aýdanda naýqastardyń em-domyna qajetti ottegi ballondarymyz da bar. Dári-dármek jetkilikti. Aýdandaǵy provızorlyq ortalyqqa jergilikti kásipkerler de barynsha qoldaý kórsetýde», - deıdi Munaıly ortalyq aýdandyq aýrýhanasy dırektorynyń mindetin atqarýshy Janar Dosjanova.

Mańǵystaý oblysyna Birikken Arab Ámirlikterinen kelgen gýmanıtarlyq kómektiń bir bóligi Munaıly aýdanyndaǵy provızorlyq statsıonarǵa jetkizilgen bolatyn. Onyń ishinde 600 kombınezon, 100 qorǵanysh kózildirigi, 1600 bir rettik halat ákelindi. Budan bólek, 2 ÓJJ apparaty jetkizildi.

Aıta ketý kerek, buǵan deıin aýdanda ókpeni jasandy jeldetý apparaty bolmaǵan. Provızorlyq ortalyq bul apparatty aldaǵy ýaqytta aýyr jaǵdaıdaǵy naýqastardy oblys ortalyǵyna jetkizý úshin qoldanýdy josparlap otyr.

Jalpy, oblys boıynsha koronavırýs ınfektsııasy jáne pnevmonııa boıynsha jaǵdaıdyń turaqtanǵany baıqalady.

Jedel járdem stansalaryna túsetin shaqyrtý sany azaıdy. Oblystyq jedel járdemge shilde aıynyń basynda barlyǵy 900 shaqyrtý tússe, qazirgi tańda oblys boı̆ynsha 595 shaqyrtý túsken. ıAǵnı, oblys boıynsha shaqyrtýlar sany 305-ke azaıǵan.

Sondaı-aq, provızorlyq statsıonarǵa túsetin naýqastardyń sany eki eseden asa qysqardy. Kúnine 250-den 100-ge deıin. Sońǵy aptada jazylyp shyqqan naýqastar sany kúnine 150-ge jetti.