Mańǵystaýda para alǵan sheneýnikke 5,6 mln teńge aıyppul salyndy

AQTAÝ. QazAqparat - Oblystyq jumyspen qamtýdy úılestirý jáne áleýmettik baǵdarlamalar basqarmasynyń bólim basshysyna 5 mln 698 myń teńge aıyppul salyndy, dep habarlaıdy QazAqparat tilshisi.

Ony QR Sybaılas jemqorlyqqa qarsy agenttiktiń oblystyq departamenti mamandary ustaǵan bolatyn. Sheneýnikke qatysty QR Qylmystyq kodeksiniń 366-baby 2-bóligimen is qozǵalyp, sybaılas jemqorlyq qylmysyn jasaǵany úshin kináli dep tanylǵan.

Oǵan osy bap boıynsha memlekettik qyzmette, jergilikti ózin-ózi basqarý organdarynda, memlekettik uıymdarda jáne jarǵylyq kapıtalynda memleket úlesi elý paıyzdan asatyn uıymdarda, ulttyq kompanııalarda basshy jáne materıaldyq jaýapty laýazymdardy atqarýǵa ómir boıyna tyıym salyndy.

Budan bólek, azamatshadan memleket paıdasyna sot saraptama júrgizýge jumsalǵan is júrgizý shyǵyny - 44 435 teńge, sondaı-aq jábirlenýshilerge zııandy óteý qorynyń paıdasyna - 20 AEK mólsherinde 50 500 teńge óndirilgen.

Sheneýnik úkim zańdy kúshine engen soń bir aıdan keshiktirmeı aıyppul tóleýge mindettelgen. QR QK 41-babynyń 3-bóligine saı qylmys jasaǵany úshin taǵaıyndalǵan aıyppuldy tóleýden jaltarǵan jaǵdaıda qamaýǵa alynady.

«Azamatshaǵa qatysty aıyptaý úkimi shyǵyp, Aqtaý qalalyq sotymen 5 mln 698 myń teńge aıyppul salyndy»,-dedi QR Sybaılas jemqorlyqqa qarsy is-qımyl agenttiginiń oblystyq departamentiniń asa mańyzdy ister jónindegi tergeýshisi Nurbek Daýmov.