Mańǵystaýda onkologııamen aýyratyn naýqastardyń sany artty

AQTAÝ. QazAqparat – Mańǵystaý oblysynda onkologııalyq dertke shaldyqqandardyń sany byltyrǵymen salystyrǵanda 11,4 paıyzǵa artqan. Ásirese, sút bezi jáne ókpe, ishek qaterli isikterimen aýyratyndar kóbeıgen, dep habarlaıdy QazAqparat tilshisi.

«Óńirde jyl basynan beri onkologııalyq aýrýlarmen 491 naýqas tirkelgen. Naýqas sany ótken jylmen salystyrǵanda 11,4 paıyzǵa ósti. Olardyń 263-iniń aýrýy I, II satysynda anyqtaldy. Byltyr 228-i naýqasty anyqtaı alǵan edik. Degenmen, IV satysynda anyqtalǵan naýqastar sany azaıyp otyr. Bul degenimiz – qazirgi kúni aýrý erte anyqtalady, ıaǵnı adamdar erte qaralady», - dedi oblystyq onkologııalyq dıspanseriniń basshysy Nurlan Jarıev óńirlik kommýnıkatsııalar ortalyǵynda ótken brıfıngide.

Oblysta onkologııalyq aýrý boıynsha ólim-jitim tómendegen. Máselen, bıyl 150 adam qaıtys bolsa, byltyr 190 adam osy syrqattan kóz jumǵan. Bes jyldan asa ómir súretin naýqastardyń ósý dınamıkasy jyl saıyn 5-6% bolyp otyr. Bul – el boıynsha úzdik kórsetkishterdiń biri bolyp esepteledi.

«Oblystaǵy onkodıspanser ǵımaratynyń qurylysy aıaqtaldy. Qazirgi tańda mekemede 40-tan astam dáriger qyzmet atqarady. 23 maman elimizdiń ár óńirinen shaqyrtýmen kelip jumys jasap jatyr. Olardyń ekeýi – medıtsına ǵylymdarynyń doktory bolsa, tórteýi – medıtsına ǵylymdarynyń kandıtaty. Sondaı-aq, 11 dáriger rezıdentýrada oqyp, bilimderin shyńdap jatyr», - dedi Nurlan Jarıev.

Jalpy, jyl basynan beri 16 525 adam sút bezi jáne 19 548 adam jatyr moıny obyry boıynsha skrınıngtik tekserýden ótken. Radıologııalyq bólimde 173 patsıent emdelip, 169 naýqasqa ota jasalǵan.