Mańǵystaýda oqýlyq satyp alý úshin 1 mlrd teńge bólindi
ASTANA. QazAqparat - Mańǵystaýda mektep oqýlyqtaryn satyp alý úshin 1 mıllıard teńgeden asa qarjy bólingen, dep jazady Lada.kz
25 tamyzǵa deıin oblys mektepterine oqýlyqtar jetkizilýi tıis. Jańa oqýlyqtar 2, 5, 7-synyp oqýshylaryna arnalǵan. Bul týraly Mańǵystaý oblystyq bilim basqarmasynyń basshysy Zeınep Tastemirova málimdedi.
Mektepterdi oqýlyqpen qamtamasyz etý úshin jergilikti bıýdjetten 1 mıllıard 63 mıllıon 995 myń teńge bólingen. Zeınep Tastemirovanyń aıtýynsha, bıyl barlyq balaǵa oqýlyq jetkilikti bolady.
«Bıylǵy oqý jylynda 2, 5, 7 - synyp oqýshylary jańartylǵan baǵdarlamamen oqıdy, sol sebepti tek atalǵan synyptarǵa oqýlyq alyp otyrmyz. Oǵan qosa, 1-synypqa kórkem ádebıet oqýlyǵy alynady. 18 baspa úıi óńirimizge oqýlyqtar jóneltedi, sondyqtan buǵan baılanysty másele týyndamaýy kerek. Jyl saıyn oqýshylar sany artyp, ata-analar oqýlyq jetispeıdi degen shaǵymdar aıtyp jatady. Mundaı jaǵdaıda artyq oqýlyǵy bar mektepterden kitap ózge mektepterge beriledi», - deıdi Zeınep Tastemirova.
Basqarma basshysynyń aıtýynsha, 12 jyldyq bilim berýge kóshetin synyptar jańartylǵan baǵdarlamamen oqıdy.
«2016 jyldan bastap 1-synyp oqýshylary jańartylǵan mektep baǵdarlamasymen oqýdy bastap ketti. Olar jańa oqýlyqpen jańa júıede bilim alýda. 1-synyptar aptasyna 5 kún oqıdy. 2019-2020 jyldary Qazaqstannyń barlyq mektepteri 12 jyldyq bilim berýge kóshedi dep kútilýde», - deıdi ol.
Buǵan deıin Aqtaý qalalyq bilim bóliminiń basshysy Svetlana Tólebaeva 2019 jyldan bastap 1-synypqa qabyldanatyndar mindetti túrde 1 qyrkúıekke deıin 6 jasqa tolýy kerektigin aıtqan bolatyn.
Aıta ketý kerek, Aqtaýda jańa oqý jylynda 1-synyp oqýshylaryna tegin mektep formasy úlestirilmeıdi.
