Mańǵystaýda oq jaraqatymen birneshe adam aýrýhanaǵa tústi
ASTANA. QazAqparat - Mańǵystaý oblystyq aýrýhanasyna oq tıip jaraqat alǵan úsh adam jetkizildi. Olar Quryq aýylynan 6 qyrkúıek kúni saǵat 02:00-de túsken, dep habarlaıdy QazAqparat Lada.kz saıtyna silteme jasap.
Oblystyq aýrýhananyń baspasóz qyzmetinen málim etkendeı, eki zardap shegýshi neırohırýrgııa jáne travmatologııa bólimshelerinde ortasha aýyr jaǵdaıda jatyr.
«1990 jylǵy naýqastyń tómengi jaǵy men samaıyna oq tıip jaraqattanǵan. Qazir neırohırýrgııa bóliminde ortasha aýyr jaǵdaıda jatyr. 1994 jylǵy ekinshi zardap shegýshiniń eki qoly men kókirek qýysyna oq tıgen. Ol travmatologııa bólimine jatqyzyldy. Jaǵdaıy ortasha aýyr deńgeıde. 1994 jyly týǵan úshinshi zardap shegýshi qursaq qýysy, kókirek qýysy, aıaǵy, asqazany, ash ishegi men toq ishegine bydyraly jaraqat alǵan. Ota jasalyp, kókbaýyryn alyp tastadyq. Qazir jansaqtaý bóliminde jatyr, ókpesi jasandy apparatqa qosylǵan», - dep túsindirdi Mańǵystaý oblystyq aýrýhanasy qabyldaý bóliminiń meńgerýshisi Aıtqalı Shalabaev.
Dárigerdiń aıtýynsha, olardyń úsheýi de - Quryq aýylynyń turǵyndary.
