Mańǵystaýda ógeı balasyn óltirgen áıelge qatysty sot bastaldy
AQTAÝ. QazAqparat - 16 jastaǵy ógeı balasyn asa qatygezdikpen pyshaqtap óltirgen áıeldiń isine qatysty sot protsesi bastaldy. Іs Mańǵystaý oblysynyń qylmystyq ister jónindegi mamandandyrylǵan aýdanaralyq sotynda qaralýda, dep xabarlaıdy QazAqparat tilshisi.
Osyǵan deıin azamatsha S.-ǵa qatysty QR Qylmystyq kodeksiniń 99-baby 2-bóliginiń 14-tarmaǵymen qylmystyq is qozǵalyp, tergeý amaldary júrgizilip, sotqa joldanǵan bolatyn.
Alǵashqy sot tyńdaýynda aıyptalýshydan, jábirlenýshiniń ókilderinen, sot-medıtsına sarapshysynan jaýap alyndy. Májilis zalynda istegi jazbasha dáleldemeler zertteldi.
«Sottalýshy ózine qatysty qylmystyq isti alqabılerdiń qatysýymen qaraýdan bas tartyp otyr. Kelesi sot otyrysy aǵymdaǵy jyldyń 6 sáýiri kúni, saǵat 10.00-de jalǵasady»,- dedi oblystyq qylmystyq ister jónindegi mamandandyrylǵan aýdanaralyq sotynyń baspasóz qyzmetiniń jetekshisi Gaýxar Nurxanova.
Eske sala ketsek, sotqa deıingi tergeý organdary sottalýshy S.-ny Beıneý aýdanynda óz úıinde kámeletke tolmaǵan ógeı balasyn óltirdi degen aıyp taqty. Qatygez áıel 16 jastaǵy Nursultandy 20 jerinen pyshaqtaǵan. Bul oqıǵa Mańǵystaý xalqyn dúr silkindirgen bolatyn.
Marqum Nursultan týǵan ákesimen, ógeı sheshesimen jáne baýyrlarymen turǵan.
Kýágerlerdiń aıtýynsha, marqum osyǵan deıin ógeı sheshesinen zorlyq-zombylyq kórip kelgen. Buǵan shydamaǵan bala áıelge sóz qaıtara bastaǵan. Aıýandyqpen qaza tapqan balanyń týǵan anasy ádil úkim shyǵarylýyn kútedi. Al, ákesi áıeliniń jazasyn jeńildetýdi surady. Sebebi, ortaq nekede balalary bar ekenin aıtady.
