Mańǵystaýda oba aýrýyna qarsy vaktsınatsııa júrip jatyr

AQTAÝ.QazAqparat - Mańǵystaýda oba aýrýyna qarsy vaktsınatsııa júrgizilip jatyr. Óńirde 13 myńnan astam adam obaǵa qarsy ekpe alady dep josparlanǵan, dep habarlaıdy QazAqparat tilshisi.

Búginde oblys halqynyń 70 paıyzy ekpe alǵan.

«Oba derti jazda órshıdi. Sondyqtan vaktsınalaý jyl saıyn kóktem mezgilinde bastalady. Ekpe aýrýdyń aldyn alýǵa kómektesedi. Ásirese dalalyq jerde jumys jasaıtyn azamattar, medıtsına salasynyń qyzmetkerleri, veterınarlar men jedel járdem qyzmetkerleri mindetti túrde ekpe alady. Adam ekpe almas buryn dáriger tekserisinen ótýi tıis. Aıta keteıik, oblysymyzda sońǵy 20 jylda oba aýrýy tirkelmegen. Bul - indettiń aldyn alý is-sharalarynyń nátıjesi dep bilemiz», - deıdi Mańǵystaý oblystyq sanıtarııalyq-epıdemıologııalyq baqylaý departamentiniń basshysy Gúlnar Kórkinbaeva.

Vaktsınatsııa mamyr aıynyń sońyna deıin jalǵasady.