Mańǵystaýda Naýryz merekesine oraı 250-den astam is-shara ótedi

AQTAÝ. QazAqparat – Mańǵystaý oblysynda Ulystyń uly kúni – Naýryz merekesinde 250-den astam mádenı is-shara uıymdastyrylady. Bul týraly oblystyq mádenıet, arhıvter jáne qujattama basqarmasynyń bólim basshysy Ásem Áshirova málim etti, dep habarlaıdy QazAqparat tilshisi.

«Biz Naýryz meıramynda balalardy da nazardan tys qaldyrmadyq. Mereke kúni búldirshinderge ulttyq naqyshtaǵy sımvoldyq syılyqtar taratylyp, 16-23 naýryz aralyǵynda teatrlarda «Kel, balalar, oınaıyq-2023» ıntermedııasy, «Batyrlar saıysy» teatrlandyrylǵan qoıylymy kórsetiledi. Sonymen qatar, qala, aýdan ákimdikteri men «Meıirimdi ana» qoǵamdyq qorynyń uıymdastyrýymen «Naýryz ata» qaıyrymdylyq sharasy ótedi. Al, 22 naýryzda amfıteatr sahnasynda «Ulystyń Uly kúni – Naýryz» balalar shyǵarmashylyq ujymdarynyń merekelik kontserti, mýzeılerde ulttyq oıyndar aptalyǵy, kitaphanalarda tıisti taqyryptyq ekspozıtsııalar uıymdastyrylady», - dedi Ásem Áshirova qoǵamdyq kommýnıkatsııa ortalyǵynda ótken brıfıngide.

Sondaı-aq, spıker aqsaqaldar men ardagerlerdiń qatysýymen «Naýryz bata» basqosýy ótetinin málimdedi. Sonymen qosa, 21-22 naýryzda qala, aýdandarda «Jańa kún – Naýryz bastaýy», «Altybaqan» oıyn-saýyq baǵdarlamasy, «Qosh keldiń, áz Naýryz» taqyrybynda kontsertter ótedi jáne Aqtaý qalasyndaǵy teńiz jaǵalaýynda 30-ǵa jýyq kıiz úı tigilip, altybaqandar ornatylady.

«Mádenı is-sharalardyń qatarynda «Aqtaý sazy» folklorlyq ansambliniń kontserti, «Altybaqan» oıyn-saýyq baǵdarlamasy, stýdentterdiń kontserti bar. Al, 22 naýryz kúni keshke deıin ulttyq salt-dástúr men ádet-ǵurypqa baılanysty is-sharalar ótkizý kózdelgen. Atap aıtsaq, «Naýryz dýman» teatrlandyrylǵan kórinisinen bastaý alyp, tanymal estrada juldyzy, ánshi Baýyrjan Isaevtyń kontsertine ulasady», - dedi ol.