Mańǵystaýda narazy top joldy japty degen aqparat - jalǵan

AQTAÝ. QazAqparat – Mańǵystaý oblysynda 2 maýsym kúni saǵat 18.00 shamasynda áleýmettik jelilerge aqyly jolǵa narazy top joldy japty degen vıdeolar taraı bastady. Bul aqparatqa qatysty jaǵdaıdy Mańǵystaý oblysynyń polıtsııa departamentiniń ókilderi túsindirdi.

Departamenttiń baspasóz qyzmetiniń habarlaýynsha, bul jalǵan aqparat.

«Gaz tasymaldaıtyn kóliktiń Aqtaý qalasyna qaraı burylyp, manevr jasaǵan sáti beınejazbaǵa túsken. Gaz tasymaldaıtyn kóliktiń júrgizýshisi, N. esimdi Aqtaý qalasynyń turǵyny óziniń Munaıly aýdanyna qaraı bara jatqanyn jáne jarty jolda qalaǵa qaıtýǵa sheshim qabyldap, «T-tárizdi» rettelmeıtin qıylysta burylys jasaǵanyn jetkizdi. Alaıda, burylý manevrin jasaý kezinde gaz tasyǵysh kólik toqtap qalyp, soǵan baılanysty jasandy keptelis paıda boldy», -delingen habarlamada.

Keptelis ornyna kelgen polıtsııa qyzmetkerleri sanaýly mınýttarda gaz tasymaldaıtyn kóliktiń júrgizýshisine burylýǵa kómektesti. Bul rette júrgizýshi eshqandaı jol qozǵalysy erejesin buzǵan joq.

Áleýmettik jelilerde taratylǵan beınejazbada kórsetilgen joldyń jabylýy týraly fakt rastalmaıdy.