Mańǵystaýda myńnan astam bala aýtızm dertine shaldyqqan
Erekshe balalardy qoldaýǵa jáne túsinýge tartý maqsatynda osy dertke shaldyqqan perzenti bar ata-analar aktsııa ótkizdi. «Arda-Aqtaý» qoǵamdyq birlestiginiń muryndyq bolýymen ótken sharaǵa júzden astam otbasy qatysty.
Bul aktsııa sońǵy úsh jyl boıy oblys kóleminde ótip keledi. Aktsııa barysynda dertke shaldyqqan balalardyń ata-anasyna qarjylaı qoldaý kórsetiledi. Bul joly da atalmysh úrdis jalǵasyn taýyp, sondaı-aq, erekshe balalar óner kórsetti.
«Búgingi shara - qoǵamdyq birlestik pen ata-analardyń birigip jasaǵan jumysynyń nátıjesi. «Aýtızm» dıagnozy bar adamdardyń taǵdyryna biz beı-jaı qaraı almaımyz. Damý erekshelikteri, ıa bolmasa basqa faktorlarǵa qaramastan, biz úshin barlyǵy mańyzdy. Qoǵamdyq birlestik bıyl mine úshinshi jyl óziniń jumysyn jalǵastyryp kele jatyr. Mańǵystaý oblysy boıynsha mundaı bala tárbıelep otyrǵandar óte kóp. Búgin solardyń tek qana júzden astamy jınaldy. Keleshekte osyndaı balalardy ońaltýǵa arnalǵan bir ortalyq ashylady dep kútip otyrmyz», - deıdi uıymdastyrýshylar.
Sharany uıymdastyrýshylar shaqyrylǵan kópshilikke aýtızm dertine shaldyqqan jandardan teris aınalmaı, olardy qoǵamǵa beıimdeýdiń mańyzyn túsindirdi. Ata-analarmen pikir almasyp, perzentimen birge oıyndar oınaýǵa shaqyrdy. Erikti jastar ázirlegen kóńildi baǵdarlama balalardyń kóńilin kóterdi. Dástúrli aktsııa sońy fleshmobqa ulasty.
Aıta keteıik, jer betinde aýtızm syrqatyna shaldyqqan 67 mln asa adam bar bolsa, álemdegi árbir 42-shi er bala men 189-shy qyz bala aýtızmniń spektrinde tur. Al resmı emes derekterge súıensek Mańǵystaý oblysynda myńnan astam bala túrli deńgeıdegi aýtızm dertine shaldyqqan.
