Mańǵystaýda munaı salasyna jumysqa turǵyzam dep elden aqsha jınaǵan alaıaqtar ustaldy
AQTAÝ. QazAqparat – Aqtaý jáne Jańaózen qalalarynyń turǵyndarynan munaı salasyna jumysqa ornalastyramyn dep alaıaqtyq jolmen aqsha alǵan eki adam ustaldy, dep habarlaıdy QazAqparat tilshisi.
Alaıaqqa aldanǵandardyń biri – Aqtaý turǵyny. Ol «munaı salasyna jumysqa ornalastyryp beremin» degen adamǵa 6 mln teńge kóleminde aqsha bergen.
Dál osyndaı aryzben polıtsııaǵa aryzdanǵannyń ekinshisi – jańaózendik. Ol alaıaqtarǵa 1 150 000 teńge kóleminde shyǵyndanǵan.
«Jedel izdestirý sharalary nátıjesinde 45 jastaǵy Jańaózen qalasynyń turǵyny men 27 jastaǵy kúdikti áıel anyqtalyp, ustaldy»,-dep málim etti polıtsııa departamentinen.
Atalǵan faktiler boıynsha QR Qylmystyq kodeksiniń 190-baby 1-bóligimen (alaıaqtyq) sotqa deıingi tergep-tekserý bastaldy.
