Mańǵystaýda muǵalim tapshylyǵyna baılanysty pedagogıkaǵa qosymsha granttar bólindi
10 shildeden bastap mańǵystaýlyq túlekterdi aqparattyq qoldaý maqsatynda mektepterde keńes berý pýnktteri ashylady.
Bul týraly qoǵamdyq kommýnıkatsııa ortalyǵynda ótken brıfıngte oblystyq bilim basqarmasy basshysynyń orynbasary Gúlmıra Mamaeva habarlady.
Spıkerdiń aıtýynsha, mektepterde ashylatyn keńes berý pýnktterinde elimizdegi 43 ýnıversıttiń ókilderi shaqyrylǵan.
Olar 10-20 shilde aralyǵynda talapkerlerge qajetti aqparat beredi.
UBT-dan tıisti shekti baldy jınaǵan túlekter elimizdegi Almaty, Nur-Sultan, ShQO, SQO, Qostanaı, Aqmola, Qaraǵandy, Pavlodar oblysynyń ýnıversıtetterin tańdaı alady.
Grantqa tapsyrý 13 shilde men 20 shilde aralyǵynda ótedi.
Aıta keteıik, osyǵan deıin Mańǵystaý túlekterine qosymsha 6 myń grant bólingenin aıtqan bolatynbyz.
«Bul - talapkerlerge úlken múmkindik. Basty basymdyq pedagogıkalyq jáne tehnıkalyq mamandyqqa beriledi. Oblysta muǵalimder tapshylyǵy birneshe ýaqyttan beri aıtylyp keledi. Ásirese, orys tili men ádebıetinen ustaz jetispeıdi. Sondyqtan osy bólingen grant arqyly kadr jetispeýshiligin joıýdy josparlap otyrmyz. Bıyl túlekterdiń 80%-dan astamy UBT-ǵa qatysyp jatyr. 13-20 shilde aralyǵynda memlekettik bilim granty konkýrsyna qujat qabyldaý bolady»,-dedi Gúlmıra Mamaeva.
Sonymen qatar, 2018 jyldan beri jergilikti bıýdjet esebinen joǵary jáne joǵary oqý ornynan keıingi bilimi bar kadrlardy daıarlaý úshin jergilikti bıýdjetten bilim granttary bólinip keledi.
«Aldaǵy oqý jylyna jergilikti bıýdjetten 175 grant bakalavr mamandyqtaryna bólindi (medıtsına, óner, aýyl sharýashylyǵy salalaryna). Tamyz aıynda konkýrs komıssııasynyń otyrysy ótkizilip, grant ıegerleri anyqtalatyn bolady. Atalǵan konkýrs jónindegi aqparattar shilde aıynyń ekinshi jartysynda bilim basqarmasynyń ınternet resýrstarynda habarlanady»,-dedi Gúlmıra Mamaeva.
Aıta keteıik, bıylǵy oqý jylynda Mańǵystaýda 7562 túlek mektep bitirdi. Onyń ishinde 174 altyn belgi men 520 úzdik attestat ıegeri bar.
