Mańǵystaýda «Meniń elim» baǵdarlamasy aıasynda 5 joba júzege asyryldy
AQTAÝ. QazAqparat - 2017 jyly «Samruk-Kazyna Trust» áleýmettik jobalardy damytý qory Mańǵystaý oblysynda aýqymdy «Meniń elim» áleýmettik ınvestıtsııalar baǵdarlamasyn iske qosty, dep habarlaıdy oblys ákimdiginiń resmı saıty.
«Meniń elim» baǵdarlamasy Qordyń kompanııalar toby bar óńirlerinde ómir súrý sapasyn jaqsartýǵa baǵyttalǵan jobalardy biriktirdi. Baǵdarlamanyń basty maqsaty - óńirlerdegi ómir súrý sapasyn Astana jáne Almaty qalalaryndaǵy ómir súrý deńgeıine deıin joǵarylatý.
«Meniń elim» baǵdarlamasy birneshe baǵytty qamtıdy: azamattyq bastamalardy qoldaý arqyly jergilikti qoǵamdastyqtardy damytý, áleýmettik ınfroqurylymdy damytý, tarıhı-mádenı murany jańǵyrtý jáne salaýatty ómir saltyn damytý.
Ótken jyly «Samruk-Kazyna Trust» qory óńirde 4 mańyzdy jobany iske asyrdy. Atap aıtqanda, jalpy bilim berý mektepterin sporttyq quraldarmen qamtý baǵdarlamasynyń aıasynda Mańǵystaý oblysynyń 50 mektebi 47 jańa sporttyq qural jıyntyǵymen qamtamasyz etildi.
Budan bólek, estý, kórý jáne oılaý qabileti nashar balalarǵa arnalǵan 4 túzetý mektebi arnaıy túzetý jáne dıdaktıkalyq quraldarmen jabdyqtaldy. Sonymen qatar, osy mektepterde balalardyń demalýy úshin jumsaq jáne sensorly bólmeler ornatyldy.
Mańǵystaý oblysynyń áleýmettik kásipkerleri «Meniń elim» baǵdarlamasy boıynsha bólingen 500 myńnan 2 mıllıonǵa deıingi granttar arqyly óz jobalaryn damytýǵa múmkindik aldy.
Sondaı-aq, baǵdarlama aıasynda Aqtaý, Jańaózen, Fort-Shevchenko qalalarynda, Munaıly aýdanynyń eki aýylynda jáne Mańǵystaý aýdanynda ornalasqan Shetpe kentinde 12 oıyn alańy men sport alańdary ashyldy.
2018 jyly Mańǵystaý oblysynda mektep oqýshylary arasynda Innovatsııalyq jobalar olımpıadasy ótti. Bas júlde aǵylshyn tilin úırený úshin Ulybrıtanııaǵa bir aılyq sapar boldy.
Aıta ketken jón, 2016 jyldan bastap «Samruk-Kazyna Trust» áleýmettik jobalardy damytý qory qaıyrymdylyq qyzmetiniń aıasynda «Samuryq-Qazyna» AQ kompanııalar toby bar óńirlerde áleýmettik-ekonomıkalyq jaǵdaıdy jaqsartýǵa baǵyttalǵan «Meniń elim» áleýmettik ınvestıtsııalar baǵdarlamasyn iske qosty. Baǵdarlamanyń basty maqsaty - óńirlerdegi ınfraqurylymdy damytý jáne jergilikti qaýymnyń ómir súrý sapasy men áleýmettik ortanyń joǵary standarttaryna, bilimge, mádenıet pen sportqa qol jetkizý múmkindikterin keńeıtý arqyly áleýmettik-ekonomıkalyq ahýaldy jaqsartýǵa yqpal etýdi kózdeıdi.
Búgingi tańda Baǵdarlama 4 oblysta - Mańǵystaý, Aqtóbe, Batys Qazaqstan jáne Pavlodar oblysynda júzege asyrylyp jatyr.
