Mańǵystaýda memlekettik qyzmetshilerge ortalyqtandyrylǵan medıtsınalyq qyzmet kórsetiledi
AQTAÝ. QazAqparat - Mańǵystaý oblysynyń memlekettik qyzmetshileri budan bylaı bir emhanada tirkelip, olarǵa ortalyqtandyrylǵan medıtsınalyq qyzmet kórsetiletin bolady, dep habarlaıdy QazAqparat.
QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Memlekettik qyzmet salasyn qadaǵalaý departamentiniń dırektory Ravıl Tólebaev pen «Arnaıy monıtorıng tobynyń» músheleri Záýresh Battalova, Nurlan Baımýrzaev, Yrza Tursynzada Aqtaý qalasynda ornalasqan klınıkany aralap shyqty.
Zamanaýı medıtsınalyq qural-jabdyqtarmen qamtamasyz etilgen jekemenshik emhana budan bylaı memlekettik qyzmetshilerge sapaly qyzmet kórsetýge ázir.
Astanadan arnaıy kelgen delegatsııa klınıkany aralap, ondaǵy dárigerlermen suhbattasyp, barlyq protsedýralyq kabınetterdi aralap shyqty.
«Memlekettik qyzmetkerler halyqqa esh ýaıym-qaıǵysyz qyzmet etýi úshin ári densaýlyǵy jaqsy bolýy úshin Agenttik bul jumystyń árbir óńirde joǵary deńgeıde uıymdastyrylýyn basty nazarda ustaıdy», - dep atap kórsetti Memlekettik qyzmet salasyn qadaǵalaý departamentiniń dırektory Ravıl Tólebaev.
QR Memlekettik qyzmet isteri jáne sybaılas jemqorlyqqa qarsy is-qımyl agenttigi memlekettik qyzmetshilerdiń áleýmettik jaǵynan qorǵalýyna erekshe kóńil bólip keledi. Olardyń baspanamen qamtamasyz etilýi, kópbalaly otbasylarǵa jazǵy demalys lagerlerine joldama berý jaıy bolashaqta kezeń-kezeńimen sheshimin tappaq. Bul bastamalardyń barlyǵy Elbasy N.Nazarbaevtyń damyǵan 30 eldiń qataryna ený tapsyrmasyna jáne «100 naqty qadam» Ult Josparyna sáıkes «Kásibı memlekettik apparat qalyptastyrý» sharalary aıasynda júzege asyrylyp jatyr.
Esterińizge sala keteıik, faktorly-baldyq shkala negizinde eńbekaqy tóleýdiń jańa júıesine sáıkes, Mańǵystaý oblysy men QR Ádilet mınıstrliginde, Astana qalasy men QR Memlekettik qyzmet isteri jáne sybaılas jemqorlyqqa qarsy is-qımyl agenttiginde bıyldan bastap jalaqy eki esege ósti. Bul pılottyq joba óz tıimdiligin kórsetse, bolashaqta elimizde barlyq memlekettik qyzmetshilerdiń jalaqysy kóteriledi.
