Mańǵystaýda memlekettik ınspektorlar para alǵandary úshin 7 jylǵa sottaldy
AQTAÝ. QazAqparat - Mańǵystaý oblystyq sotynyń qylmystyq ister boıynsha sot alqasynda «Mańǵystaý oblystyq kóliktik baqylaý ınspektsııasy» MM avtomobıl kóligin baqylaý departamentiniń eki bas mamanyna qatysty qylmystyq is qaraldy. Bireýi 7 jylǵa, ekinshisi 7,5 jylǵa jeke múlikterin tárkileý arqyly jalpy rejımdegi túzetý kolonııasynda jazasyn óteıdi jáne ómir boıy memlekettik qyzmet atqarmaıdy, dep habarlaıdy «QazAqparat» HAA tilshisi.
Aqtaý qalalyq sotynyń úkimimen sottalýshylarǵa ózderiniń qyzmettik ókildikterin paıdalaný arqyly aldyn ala sóz baılasqan laýazymdy tulǵalar tobymen birge birneshe ret úlken kólemde para aldy degen aıyp taǵyldy.
Aıyptalýshylar birneshe ret jeke kásipkerden aqshalaı jáne zattaı para alǵan. Bireýine QR Qylmystyq kodeksiniń 366-baby, 3-bóliminiń 2,4-tarmaǵy boıynsha (7,5), ekinshisine osy baptyń tek 2-shi tarmaǵy boıynsha (7) aıyp taǵyldy.
«Sottalýshylardyń zańdy ókilderi Mańǵystaý oblystyq sotynyń qylmystyq ister boıynsha sot alqasyna úkimdi aıyppul tóleýge aýystyrý týraly appelıatsııalyq ótinish jibergen. Mańǵystaý oblystyq sotynyń qylmystyq ister boıynsha sot alqasynyń sheshimimen sot úkimi esh ózgerissiz qaldy, appelıatsııalyq ótinish qanaǵattandyrylmady», - dep atap ótti Mańǵystaý oblystyq soty baspasóz qyzmetiniń mamany Gaýhar Nurhanova.
