Mańǵystaýda memqyzmetshiler korporatıvten bas tartyp, qarjyny qaıyrymdylyqqa jumsady

AQTAÝ. QazAqparat - Mańǵystaýda memlekettik mekeme basshylary men qyzmetkerleri jańajyldyq korporatıvti toılaýdan bas tartty, dep habarlaıdy QazAqparat tilshisi.

Mańǵystaý oblysynyń qoǵamdyq kommýnıkatsııa ortalyǵy taratqan málimetke súıensek, olar mereke qarsańynda áriptesterimen basqosýǵa jınalatyn qarjyny qaıyrymdylyq qoryna aýdarsa, endi bir ujym kómekke muqtaj jandarǵa qol sozdy.

Máselen, Mańǵystaý aýdanyna qarasty 12 aýyldyń ákimdik qyzmetkerleri 500 myń teńge jınap, áleýmettik jaǵynan az qamtylǵan otbasylarǵa azyq-túlik pen jańajyldyq syılyq úlestirdi.

Sondaı-aq, 6 balasy bar arbada otyrǵan anaǵa qoldaý kórsetip, qarjylaı kómek berdi. Qaraqııa aýdanynyń memlekettik qyzmetkerleri 631 myń teńge kóleminde qarjy jınap, qaıyrymdylyqqa aýdardy.

«Qaıyrymdylyq estafetasyn Mańǵystaý oblysyndaǵy mádenıet, tilderdi damytý jáne arhıv isi basqarmasy jalǵady. Ujym oblystyq ortalyq «Beket ata» meshitine 100 myń teńgege jýyq qarjy aýdarǵan. Budan bólek, Mańǵystaý oblysynyń qarjy basqarmasy, kásipkerlik jáne saýda basqarmasy, ınvestıtsııa jáne týrızmdi damytý basqarmasy, energetıka jáne turǵyn úı-kommýnaldyq sharýashylyq basqarmasy «My lıýdı, my vmeste» qaıyrymdylyq qoryna 1 kúndik jalaqysyn aýdardy» delingen habarlamada.

«30 ıgi is» respýblıkalyq aktsııasyn Mańǵystaý oblysy ákiminiń janyndaǵy áıelder isteri jáne otbasy-demografııalyq saıasat jónindegi komıssııa jalǵastyrdy.

Olar turmysy tómen otbasylarǵa as úı jıhazdary men kereýet alyp kómektesse, taǵy 20 otbasyǵa azyq-túlik jetkizdi.