Mańǵystaýda mektepterge kompıýter alýǵa jergilikti bıýdjetten qomaqty qarajat bólindi
Bul týraly óńirlik kommýnıkatsııalar qyzmeti ortalyǵynda ótken brıfıngte Mańǵystaý oblystyq bilim basqarmasynyń basshysy Asqar Seıdalıev málimdedi.
Onyń aıtýynsha, óńirdegi epıdemıologııalyq ahýaldyń turaqsyzdyǵyna baılanysty bıyl barlyq mektepter qashyqtan oqytylady. Bul rette turmysy tómen otbasylardyń oqýshylaryn kompıýterlik qurylǵylarmen qamtý sharalary qarastyrylǵandyǵyn aıta ketý kerek. Osy maqsatta mektepterdegi kompıýterlik qurylǵylar oqýshylarǵa ýaqytsha paıdalanýǵa beriledi. Oǵan jergilikti bıýdjetten 1,2 mlrd. teńgeden astam qarjy bólinip, 6700-ge jýyq kompıýterlik qurylǵylardy satyp alý protsesi júrip jatyr.
«Sonymen qatar turmysy tómen otbasynan shyqqan balalarǵa metsenattar jáne kásipkerlerdiń qoldaýmen kompıýterler men noýtbýktar satyp alynatyn bolady. Qashyqtan oqytý barlyq mektepterde mektep.edu.kz elektrondy jýrnaly aqparattyq júıesindegi www.ok.edus.kz platformasynda jalǵasady. Platformada kúntizbelik-taqyryptyq josparlar men úı tapsyrmalary, oqýshymen keri baılanys, synyp jetekshileriniń synyppen jumys jasaý fýnktsıonaly iske qosyldy.
Sonymen qosa barlyq mektepter tsıfrlyq bilim berý resýrstaryn qoldanady. Qashyqtyqtan oqytýdy úılestirý maqsatynda respýblıkalyq biliktilikti arttyrý ortalyqtary arqyly barlyq mektep muǵalimderi onlaın kýrstardan ótedi»,-deıdi Asqar Seıdalıev.
Sondaı-aq, qashyqtan oqytýdy sapaly júrgizý úshin jergilikti atqarýshy organdar óńirdegi baılanys operatorlarymen ınternet jyldamdyǵy álsiz shalǵaı eldi mekenderge ınternet júrgizý jumystaryn júrgizip jatyr.