Mańǵystaýda mektepter beınebaqylaý júıesimen qanshalyqty qamtylǵan
Mańǵystaý oblysy bilim basqarmasynyń basshysy Svetlana Tólebaevanyń aıtýynsha, Mańǵystaýdaǵy bilim berý uıymdary beınebaqylaý kameralarymen tolyq qamtamasyz etilgen.
«Polıtsııa departamenti mamyr aıynda oblys mektepterindegi beınekameralardyń jumysyna, qoldanystaǵy standartqa sáıkestigine monıtorıng júrgizdi. Beınekameralardyń ruqsat etý qabiletiniń sáıkes kelmeýi, aqparat jadysynyń 30 táýlikten asa saqtalmaýy, jedel basqarý ortalyǵyna qosylmaýy sekildi talapqa saı emes jaǵdaılar anyqtaldy. Aqtaý qalasy boıynsha 24, Jańaózen qalasy boıynsha 19 mektepke monıtorıng júrgizildi. Sonymen qatar, aýyldyq jerde ornalasqan 44 mektepte beınekameralardyń úzdiksiz jumys isteý kóziniń bolmaýy da anyqtalyp otyr. Kemshilikterdi joıý úshin qosymsha ishki qarajat esebinen 85 mln. teńgege 567 beınekamera alynatyn bolady»,-dedi Svetlana Tólebaeva.
Búginde Aqtaý men Jańaózen qalasyndaǵy 39 mektep polıtsııa departamentiniń jedel basqarý ortalyǵyna qosylǵan. 1 tamyzǵa deıin 14 mekteptiń beınebaqylaý júıesin jedel basqarý ortalyǵyna qosý jumystary aıaqtalady. Al aýdan mektepteri basqarý ortalyǵyna kezeń-kezeńmen qosylatyn bolady.
«Qazirgi ýaqytta Tsıfrlyq tehnologııalar basqarmasymen birlesip aýyldyq mektepterdiń beınekameralaryn testtik rejımde qosý jumystary júrgizilip jatyr. Búginde Aqtaýda, Munaıly, Mańǵystaý jáne Túpqaraǵan aýdanynynyń 30 mektebine dabyl tutqasy ornatyldy. 111 mektepke dabyl tutqasyn ornatý úshin ishki qarajat esebinen 29 mln. teńge qaraldy»,-dedi Svetlana Tólebaeva.
15 shildege deıin Mańǵystaý, Túpqaraǵan, Munaıly aýdanynyń 44 mektebine, Jańaózen qalasynyń, Beıneý men Qaraqııa aýdanynyń 62 mektebine jáne 5 oblystyq mektepke dabyl tutqasy qoıylady. Oblystyń 7 mektebinde týrnıketter ornatylǵan. Jańaózen qalasynyń 15 mektebinde demeýshilik esebinen týrnıketter ornatylady. Jańa oqý jylynyń aldynda Tótenshe jaǵdaılar jáne Polıtsııa departamenti ókilderinen qurylǵan komıssııa bilim berý uıymdarynyń daıyndyǵyn tekseredi.