Mańǵystaýda mektep dırektorlary keń kabınetterin bosatyp jatyr
QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Mańǵystaý oblysy boıynsha departamentiniń habarlaýynsha, «Mańǵystaý - adaldyq alańy» jobalyq keńsesi qyzmetkerleri jáne arnaıy monıtorıngtik top músheleriniń qatysýymen aımaqtaǵy 141 mektep ákimshilikteriniń 75-niń qyzmettik bólmelerine monıtorıng jasaldy.
Nátıjesinde Aqtaý qalasyndaǵy №21, №29 jáne Jańaózen qalasyndaǵy №9 mektep dırektorlary shaǵyn qyzmettik bólmelerge kóshirildi.
Mysaly, Aqtaý qalasyndaǵy №21 orta mektep dırektorynyń qyzmettik bólmesi - 47 sharshy metr, al qabyldaý bólmesi - 13 sharshy metr ekendigi anyqtalyp, birinshi qabattaǵy shaǵyn bólmege kóshirildi. Bosaǵan bólme balalardy qosymsha oqytýǵa berildi. Sondaı-aq atalǵan mektep dırektorynyń qyzmettik bólmesin jaz maýsymynda júretin kúrdeli jóndeý kezinde «Open space» tehnologııasy boıynsha jabdyqtaý josparlanýda.
Al Jańaózen qalasynda - 5, Munaıly aýdanynda - 12, Beıneý aýdanynda - 8, Aqtaý qalasynda 4 mektepte (№17, 21, 23, 29) olardyń dırektorlarynyń qyzmettik bólmeleri boıynsha artyq alańdar anyqtalyp, qyzmettik bólmeler shaǵyn kabınetke kóshirilip, bosaǵan bólmeler oqýshylardyń shyǵarmashylyǵyna, qosymsha oqytý, t.b. maqsattarǵa arnalyp jasaqtalýda.
Agenttiktiń aýmaqtyq departamentiniń sybaılas jemqorlyq profılaktıkasy basqarmasynyń bas mamany Nurgúl Muqataıdyń aıtýynsha, jańa formatsııadaǵy memlekettik qyzmetshiniń aldynda memleket pen qoǵam arasyn meılinshe jaqyndatý mindeti tur. Osy maqsatta memlekettik qyzmetshilermen qatar mektep, aýrýhana, emhana, kolledj, balabaqshalar men basqa da mekemelerdiń basshylary halyqqa jaqyn bolý maqsatynda, memleketke shyǵyn keltiretin keń kabınetterden bas tartyp, birinshi qabatqa ornalasqan shaǵyn bólmelerge kóshýde.
«Elbasymyz Nursultan Nazarbaev óziniń Qazaqstan halqyna joldaýynda tıimsiz bolyp keletin bıýdjettik shyǵyndardy ońtaılandyrý týraly atap kórsetkeni barshamyzǵa málim. Joldaýdan týyndaǵan tapsyrmalardy oryndaý maqsatynda 2018 jyldyń ІV toqsanynda memlekettik organdardyń paıdalanyp otyrǵan alańdaryna monıtorıng júrgizilip, artyq alańdar ońtaılandyrylǵan bolatyn», - deıdi ol.
Bıýdjet qarajatyn tıimdi paıdalaný, mekeme basshylarynyń azamattar úshin qoljetimdiligin arttyrý maqsatynda «Mańǵystaý - adaldyq alańy» jobalyq keńsesi qyzmetkerleri men arnaıy monıtorıngilik top músheleriniń qatysýymen aldaǵy ýaqytta ózge de mekemelerge monıtorıng jasaý josparlanǵan. Bosaǵan kabınetter qosymsha bilim berý, fakýltatıvtik oqytý jáne t.b. maqsattarǵa paıdalanylmaq.
