Mańǵystaýda medıtsına mamandaryna suranys joǵary
Óńirde kadr tapshylyǵy máselesi bar. Ony sheshý maqsatynda Mańǵystaý oblystyq Densaýlyq saqtaý basqarmasy men medıtsınalyq uıym basshylary Almaty, Aqtóbe, Shymkent qalalaryndaǵy medıtsınalyq ýnıversıtetterge baryp, túlekterdi óńirge shaqyrý boıynsha túsindirý jumystaryn júrgizedi. Osylaısha, kadr tapshylyǵyn 17-20% - ǵa azaıtý josparlanǵan. Sondaı-aq ótken jyly 107 dáriger jumysqa ornalastyrylǵan. Aýyldyq jerlerge 21 jas maman jiberilgen. Olar turǵyn úımen qamtamasyz etilip, kóterme aqy tólengen.
Mereke qarsańynda Mańǵystaý oblysynyń ákimi Nurlan Noǵaev medıtsına qyzmetkerlerin kásibı merekesimen quttyqtady.
«Sizderdi kásibı merekeńiz – medıtsına qyzmetkeri kúnimen shyn júrekten quttyqtaımyn! Dáriger – jer betindegi eń asyl mamandyq! Osy aıtýly kúni densaýlyq saqtaý salasyna jaýapty mamandarǵa, barlyq dáriger men medbıkelerge, sondaı-aq tehnıkalyq qyzmetkerlerge alǵysym men rızashylyǵymdy bildirgim keledi. Óz ómirin qaterge tigý arqyly halyqtyń densaýlyǵyn saqtaıtyn aq halattylar qurmetke laıyq. Memleket bashysy Qasym-Jomart Toqaevtyń tapsyrmalaryn oryndaý úshin biz materıaldyq-tehnıkalyq jabdyqtarmen, preparattarmen, qajetti quraldarmen qamtamasyz etemiz jáne bul jumys jalǵasyn tabatyn bolady. Sebebi basty basymdyq – azamattarymyzdyń densaýlyǵy men ómiri. Óńirde jyldan-jylǵa áleýmettik mańyzy bar aýrýlardyń kórsetkishterin tómendetý boıynsha turaqty oń dınamıka qalyptasýda. Bul rette densaýlyq saqtaý obektileriniń materıaldyq-tehnıkalyq bazasy jyl saıyn jańartylyp otyrady. Oblystyq bıýdjet esebinen osy baǵytta 352 birlik medıtsınalyq tehnıka satyp alynsa, onyń 12-si kúrdeli medıtsınalyq tehnıka. Qazir olardy ornatý jumystary júrgizilip jatyr.
Qurmetti medıtsına qyzmetkerleri, osy aıtýly kúni barshańyzdy kásibı merekelerińizben taǵy da quttyqtaımyn! Sizderge zor densaýlyq, eńbekte tabys, otbasylyq baqyt pen amandyq tileımin!» - dedi ol.
Aıta ketý kerek, ótken jyly óńirde halyqtyń tabıǵı ósimi artqan. Oblysta 2023 jyldyń 5 aıynda 8 myńnan astam bala dúnıege kelgen. Sonymen qatar oblystyq aýrýhana dárigerleriniń jumysyna sońǵy tehnologııadaǵy jabdyqtardy engizý jumysy jalǵasyp jatyr.
Shetelde dárigerlerdiń biliktiligin jyl saıyn arttyrý, kóshpeli sheberlik synyptaryn ótkizý jáne sheteldik mamandarmen tájirıbe almasý úshin jergilikti bıýdjetten 100 mln teńge bólingen. Oblystaǵy medıtsınalyq qyzmet kórsetetin ortalyqtar 93%-ǵa deıin materıaldyq tehnıkalyq bazamen qamtamasyz etilgen.
