Mańǵystaýda «Mangystau Nauryz Fest» festıvali bastalady
Ulttyq dástúrdi dáripteıtin jastar festıvaliniń maqsaty - Amal jáne Naýryz meıramyn jańa úlgide toılaý dástúrin qalyptastyrý, qoǵamdy uıystyrýǵa baǵyttalǵan qundylyqtardy nasıhattaý.
Festıvaldiń baǵdarlamasyna sáıkes oblys kóleminde túrli deńgeıdegi qoǵamdyq-mádenı sharalar uıymdastyrý josparlanǵan.
«14 naýryz - «Amal merekesinbe» óńir volonterlary qala turǵyndary men qonaqtaryn merekemen quttyqtap, «Jyl qutty bolsyn» ataýymen táttiler úlestiredi jáne osy kúni turǵyndar arasynda «Ult naqyshy» foto baıqaýy jarııalanady. Turǵyndar 14-22 naýryz kúnderi aralyǵynda «instagram» áleýmettik jelisine qazaqtyń ulttyq kıimderimen túsken sýretterin #MangystauNauryzFest2021 #UltNaqyshy2021 heshtegteri arqyly jarııalaý arqyly baıqaýǵa qatysa alady. Úzdik sýretterdi óńirge tanymal, kásibı fotograf mamandar tańdap, jeńimpazdar marapattalady.
15 naýryz – «Jaılaý kúninde» óńir jastarynyń qatysýymen aýdan jáne qala ortalyqtarynda ornalasqan saıabaqtarda tal egý sharasy ótedi. Keminde 500 túp tal egiledi dep josparlanǵan.
16 naýryz – «Shejire» jáne 17 naýryz – «Tarıhqa taǵzym» kúnderi Munaıly jáne Qaraqııa aýdandarynda «Aq jol» jastar teatrynyń áýesqoı ártisteriniń qatysýymen Naýryz meıramynyń tarıhı mánin aıqyndaıtyn dramatýrg Óten Ahmettiń «Elim dep ótken er Jalaý» qoıylymy kórsetilip, aýdandyq jáne qalalyq murajaılarǵa taqyryptyq ekskýrsııalar uıymdastyrylady.
17 naýryz «Tarıhqa taǵzym» taqyrybymen oblystyq jas aqyndar aıtysy ótedi.
18 naýryz - «Igi ister kúninde» – Mańǵystaý oblysynyń volonterlar korpýsynyń Aqtaý qalasyndaǵy №69 túzetý mekemesinde sottalǵan azamattarǵa kitap syılaý sharasy ótedi. Sonymen qatar, óńirdegi volonterlik toptar men jastar uıymdarynyń qaıyrymdylyq sharalary josparlanǵan.
19 naýryz «Shymyrlyq jáne sheberlik» dep atalatyn kelesi kúni Mańǵystaý aýdanynda jas qusbegiler jáne ulttyq sport túrlerinen (asyq atý, arqan tartys, kúsh synasý) jarystary ótse, Jańaózen qalasynda sadaq atýdan respýblıkalyq jarys ótedi. Al, Aqtaý qalasynda jas qylqalam sheberleri merekege baılanysty taqyryptyq týyndylar salyp, ózara baq synasady.
20 naýryz – «Zııatkerlik kúni» Mańǵystaý oblysynyń toǵyzqumalaq federatsııasymen birlese jastar men jasóspirimder arasyndaǵy toǵyzqumalaq oıyndarynyń qalalyq saıysy ótedi.
21-22 naýryz – «Ulystyń Uly kúni» – QR Táýelsizdiginiń 30 jyldyǵyna arnalǵan teńiz jaǵalaýynda qala turǵyndary men qonaqtaryna mýral tanystyrylady.
14-22 naýryz aralyǵynda «Ulttyq taǵamdar kúnine» oraı Mańǵystaý oblysynyń turǵyndary «ınstagram» áleýmettik jelisine Naýryz meıramynda daıyndalatyn taǵamdardyń daıyndalýyn, dastarhan jaıý ádebin kórsetetin beınerolıkter baıqaýy jáne Qaraqııa aýdany jastaryna arnalǵan ulttyq qundylyqtary men salt-dástúrlerin dáripteıtin «Berekeli, merekeli – áz Naýryz» beınerolıkter baıqaýy jarııalanady.
Baıqaýǵa qatysýshy #MangystauNauryzFest2021 #NaýryzMáziri heshtegteri arqyly jelige jarııalaý arqyly qatysady.
Oblys kóleminde uıymdastyrylǵan is-sharalar áleýmettik jelilerde #MangystauNauryzFest2021 #MańǵystaýJastary resmı heshtegteri arqyly jarııalanady.
