Mańǵystaýda malǵa shabý oqıǵasynan keıin 115 ıt atyldy
ASTANA. QazAqparat - Mańǵystaý oblysy Saın Shapaǵatov aýylynda malǵa shabý oqıǵasynan keıin 115 ıt atyldy, dep habarlaıdy Lada.kz.
Aýyl ákimi Ǵabıden Nurjaýbaıdyń aıtýynsha, ıtterdiń malǵa shabýyna qatysty 33 oqıǵa tirkelgen. Aýylda túngi kezekshilik qoıylyp, kósheler men qoralar kúzetile bastaǵan.
«Qazir ıesiz ıtterdi aýlaý jumystary júrip jatyr. Ótken aptada 85, demalys kúnderi taǵy 30 ıttiń kózi joıyldy. Turǵyndarǵa eskertý jasadyq. Qarǵybaýsyz júrgen ıtterdiń barlyǵy atylyp jatyr. Mal shyǵynynyń naqty sebepteri qazir anyqtalyp jatyr, biraq biz bul ıtterdiń shabýyly dep sanaımyz. Ony kórgen adamdar bar. Qasqyr nemese basqa da jyrtqysh ańnyń isine uqsamaıdy. Qazir máseleni aýyl veterınarlary tekserip jatyr», - deıdi Ǵabıden Nurjaýbaı. 
Esterińizge sala keteıik, naýryzdyń basynda Saın Shapaǵatov aýylynyń 20 shaqty malyna shabýyl jasalǵan. Ótken demalys kúnderi taǵy 12 bas mal shyǵyn boldy.
Foto: lada.kz
