Mańǵystaýda mádenıet pen óner maıtalmandary marapattaldy
AQTAÝ. QazAqparat - Mańǵystaý oblysynyń mádenıet jáne óner qyzmetkerleri ózderiniń kásibı merekesi qarsańynda joǵary marapatqa ıe boldy. Óner maıtalmandary úshin arnaıy kontsert uıymdastyrylyp, qurmet kórsetildi, dep habarlaıdy óńir basshysynyń baspasóz qyzmeti.
Sharaǵa qatysqan Mańǵystaý oblysynyń ákimi Eraly Toǵjanov bir rýhanıat janashyrlaryna tósbelgi taǵyp, dıplom men syıaqy tapsyrdy. Atap aıtsaq, Mádenıet jáne sport mınıstrliginiń «Mádenıet salasynyń úzdigi» tósbelgisimen óner zertteýshi Aıtbergen Jańbyrshy, belgili jyrshy Jetkizgen Seıtov, Mańǵystaý aýdandyq mádenıet úıiniń ádiskeri Japyraq Tanasheva, Jańaózen qalalyq «Munaıshy» mádenıet úıi janyndaǵy «Asyl mura» halyqtyq folklorlyq ansambliniń jetekshisi Qarakóz Kemerova marapattaldy.
Sondaı-aq, 2017 jyldyń qorytyndysy boıynsha mádenıet jáne óner salasynyń úzdik qyzmetkerleri oblys ákiminiń qolynan arnaıy dıplom jáne 300 000 teńge kólemindegi syıaqy aldy. Merekelik sharada sóz alǵan óńir basshysy: «Mádenıet pen óner - árqashanda ulttyq rýhanııatymyzdyń basty tiregi bolyp keldi jáne bola beredi de. Sondyqtan ulttyq bolmysymyzdy saqtaý - Siz ben bizdiń qasıetti paryzymyz.
Ult bolashaǵy eń aldymen ádebıetke, mádenıetke, ónerge tikeleı baılanysty. Qazaq halqynyń týmysynan boıynda qalyptasyp, qany men janyna sińgen asyl qasıetti qazynalarǵa negizdeletini de sózsiz.
Óńirlik tóltýma mádenı brendtiń biregeıi bolǵan Mańǵystaýdyń jeti qaıqysy men bes júıriginiń ózi osynyń naqty dáleli», - dep atap ótti.
Kúni búginge deıin óner maıtalmandarynyń qatysýymen ótken sharalar az emes. Máselen, elimizdiń, óńirimizdiń mádenı ómiriniń álemge tanylýyna aıtarlyqtaı yqpal etken «Aqjarma» folklorlyq ansambliniń Avstrııa, Túrikmenstan respýblıkalaryndaǵy kontserttik saparlaryn, oblys ónerpazdary men qolónershileriniń halyqaralyq «EKSPO-2017» kórmesindegi sátti ónerin, Mańǵystaý oblysynyń Túrkmenbashy qalasyndaǵy mádenı kúnderin, jekelegen óner ujymdarynyń shetelderdegi konkýrs, festıvalderdegi eleýli tabystaryn erekshe atap ótýge bolady.
Respýblıkalyq deńgeıde ótken Otpan taýdaǵy Amal toıy, Esenǵalı Raýshanov, Sabyr Adaı jáne Svetqalı Nurjan syndy aqyndarymyzdyń shyǵarmashylyq keshteri, 11 jyldan keıin ótkizilgen aqyndar aıtysy, N.Jantórın atyndaǵy mýzykalyq drama teatrynyń 15 jyldyq mereıtoıy.
Bul sharalar tek atalyp qana ótken joq, ulttyq rýhymyzdy kóterip, salt-dástúrimizdi jańǵyrta túskeni anyq.
