Mańǵystaýda qyzylshamen aýyrǵan 36 naýqas tirkeldi

AQTAÝ. QazAqparat - Mańǵystaý oblysynda qyzylsha aýrýyna kúdikti 48 jaǵdaı tirkelip, naýqastardan alynǵan qan synamalaryn zerthanalyq taldaý nátıjesinde 36 adamda anyqtalǵan, dep habarlaıdy QazAqparat tilshisi.

«Qyzylsha – aýa tamshylary arqyly juǵatyn vırýsty juqpaly aýrý. Aýrý dene qyzýynyń kóterilýimen, 2-4-shi kúnderi terige aqshyl qyzyl tústi bórtpelerdiń shyǵýymen, joǵarǵy tynys joldarynyń, aýyz-jutqynshaq qýysynyń jáne kózdiń shyryshty qabyqshalarynyń qabynýymen bastalady. Qyzylshany naýqaspen qarym-qatynasta bolǵan qyzylsha aýrýyna qarsy ekpe almaǵan adamdar juqtyrýy múmkin», - deıdi Mańǵystaý oblystyq sanıtarııalyq-epıdemıologııalyq baqylaý departamenti basshysynyń orynbasary Berdibek Saraltaev.

Oblysta qyzylsha aýrýy 2015 jyly (292 jaǵdaı), 2019 jyly (1 422 jaǵdaı) jáne 2020 jyly (361 jaǵdaı) órshigen. Mańǵystaý oblysy densaýlyq saqtaý basqarmasy basshysynyń orynbasary Lazzat Esenǵalıevanyń aıtýynsha, qyzylsha aýrýynan qorǵanýdyń eń tıimdi ádisi – vaktsınatsııa.

«Qyzylsha aýrýy asqynsa, saldary aýyr. Naýqas estý, kórý qabiletinen aıyrylyp qalýy, entsefalıt, aýyr dıareıa, qulaq ınfektsııasy, pnevmonııa, júrek aqaýy sekildi aýrýlarǵa shaldyǵýy múmkin», - dedi Lazzat Esenǵalıeva.

Aıta keteıik, qazir oblysta 16 396 doza qyzylshaǵa qarsy ekpe bar. Turǵyndar qosymsha aqparatty tirkelgen aýrýhanalaryna baryp bile alady.